जर्ज मन्सीको विस्फोटक शतकप्रेरित सुदूरपश्चिम रोयल्सले सिद्धार्थ बैंक नेपाल प्रिमियर लिग (एनपिएल) को तेस्रो संस्करणको उपाधि जित्दा थुप्रै कीर्तिमानसमेत बनाएको छ।
शनिबार कीर्तिपुरस्थित त्रिवि क्रिकेट मैदानमा भएको फाइनलमा सुदूरपश्चिमले साविक विजेता लुम्बिनी लायन्सलाई १० विकेटले पराजित गर्दै पहिलोपटक च्याम्पियन बनेको हो। यससँगै लगातार दुई संस्करणको फाइनलमा पराजित हुँदै आएको सुदूरपश्चिमले तेस्रो प्रयासमा उपाधि जितेको छ।
सुदूरपश्चिमको ऐतिहासिक जितका नायक जर्ज मन्सी बने। उनले ५४ बलमा १२ चौका र ८ छक्कासहित अविजित १२५ रन बनाए। मन्सीले ४९ बलमै शतक पूरा गरेका थिए।
मन्सीको यो शतक एनपिएलको फाइनलमा बनेको पहिलो शतक हो। यसअघि प्रतियोगिताको फाइनलमा कुनै पनि खेलाडीले शतक बनाउन सकेका थिएनन्। यस्तै यो फाइनलको उच्च स्कोर समेत हो।
पहिलो संस्करणको फाइनलमा जनकपुर बोल्ट्सका लाहिरु मिलन्थाले बनाएको ८७ रन नै फाइनलमा व्यक्तिगत उच्च स्कोर थियो। मन्सीले उक्त कीर्तिमान तोड्दै १२५ रन बनाए।
त्यस्तै, मन्सीको १२५ रन एनपिएलको फाइनलमा मात्र नभई प्रतियोगिताकै व्यक्तिगत सर्वाधिक स्कोरको कीर्तिमानसँग पनि जोडिएको छ। यसअघि चितवन राइनोजका कमिल मिसाराले बनाएको १२० रन प्रतियोगिताको व्यक्तिगत उच्च स्कोर थियो। मन्सीले उक्त स्कोरलाई उछिन्दै नयाँ कीर्तिमान बनाए।

सुदूरपश्चिमको जित अर्को अर्थमा पनि विशेष रह्यो। फाइनलमा १० विकेटको जित एनपिएल फाइनल इतिहासकै सबैभन्दा ठूलो जित हो। यसअघि पहिलो संस्करणमा जनकपुर बोल्ट्सले ५ विकेट र दोस्रो संस्करणमा लुम्बिनी लायन्सले ६ विकेटको जित निकालेका थिए। सुदूरपश्चिमले दुवैभन्दा ठूलो अन्तरको जित निकाल्दै उपाधि उचाल्यो।
लुम्बिनीले दिएको १५६ रनको लक्ष्य सुदूरपश्चिमले १३.३ ओभरमै कुनै विकेट नगुमाई पूरा गरेको थियो। मन्सीसँगै ओपनर विनोद भण्डारीले पनि अविजित ३० रन बनाए। यी दुईबीच पहिलो विकेटका लागि १५८ रनको अविजित साझेदारी भयो।
यसरी मन्सीको कीर्तिमानी शतक, एनपिएल इतिहासकै ठूलो व्यक्तिगत स्कोर र फाइनलमा सबैभन्दा ठूलो जितसँगै सुदूरपश्चिमले तेस्रो प्रयासमा पहिलोपटक एनपिएलको उपाधि जितेको छ।