दसैंको संघारमा 'घनचक्कर' उपन्यासबाट चर्चा कमाएका लेखक संजीव उप्रेतीको दोस्रो उपन्यास हंस सार्वजनिक हुने भएको छ। हाँसको मिथ र मानवीयतालाई पुस्तकको केन्द्रिय विषय बनाइएको छ। उप्रेतीका अनुसार, आप्रवासी अनुभव, पुंसत्व र नारीत्वबारे चलिआएका भाष्य तथा प्रेम र जीवनका अन्य हिस्सालाई पनि उपन्यासका विषय हुन्।
'घनचक्कर' प्रकाशित भएकाे १२ वर्ष लामो अन्तरालमा निस्कन लागेको यो पुस्तकमा पनि उनको पहिलो उपन्यासमा जस्तै यथार्थ र स्वैरकल्पनाको स्वाद पाइनेछ। लेखक उप्रेती भन्छन्, 'मानवकेन्द्रित विश्वदृिष्टबाट अलि पर बसेर हेर्दा संसार कस्ताे देखिन्छ, हंसमा मैले यसरी नै हेर्ने जमर्काे गरेकाे छु।'
२५ वर्ष त्रिभुवन विश्वविद्यालयको अंग्रेजी केन्द्रिय विभागमा प्राध्यापन गरेका उप्रेती भन्छन्, 'प्रकृतिलाई मूर्तरुपमा बुझ्नुपर्यो भनेर चरा र मान्छेका सम्बन्धको कथा लेखेको हुँ । उपन्यासमा चराको भाषा र संवादलाई समेत प्रयोगात्मकरुपमा प्रस्तुत गर्ने कोसिस गरेको छु।'
चरामा समर्पित १२ खण्डमा विभाजित 'हंस' असोज ११ गते शनिबार सार्वजनिक हुँदैछ। पुस्तकबारे लेखकहरु नयनराज पाण्डे गनेश पाैडेल र भुषिता वशिष्ठले टिप्पणी गर्ने बुक हिल प्रकाशनले जनाएकाे छ।