श्रृंखलाबद्ध प्रस्तुति लिएर लोकरक ब्याण्ड नेपथ्यले अष्ट्रेलियाको सांगीतिक यात्रा गर्ने भएको छ।
त्यहाँ बसोबास गर्दैआएका नेपालीहरूको चाहना र प्राथमिकताको सम्मान गर्दै नेपथ्यले केही वर्षयता लगातार श्रृंखलाबद्ध प्रस्तुति लिएर त्यस मुलुकको यात्रा गर्दै आएको छ। सन् २००९ बाट सुरू भएको यस्तो यात्राको यो चौथो श्रृंखला हो। यसपटक नेपथ्य भ्रमण टोलीमा छ जना ब्याण्डका सदस्य हुनेछन् भने प्राविधिक एवं व्यवस्थापन गरेर १२ सदस्यीय समूह रहनेछ।
केही दशकयता अष्ट्रेलिया, नेपाली विद्यार्थीहरू अध्ययन गर्ने मुख्य गन्तव्य बनेको छ भने, रोजगारी र बसोबासका हिसाबले पनि उल्लेख्य संख्यामा नेपालीहरू उता पुगेका छन्। नेपाली संगीतको आस्वादलाई आफूसँगै बोकेर गएका तिनै नेपालीको चाहनालाई ध्यानमा राखेर नेपथ्यले पनि अष्ट्रेलिया यात्रालाई उच्च प्राथमिकता दिँदै आएको छ।
यो वर्षको पहिलो नेपथ्य कन्सर्ट भने क्वीन्सल्याण्ड राज्यको राजधानी ब्रिसबेनमा हुनेछ। त्यहाँस्थित फोर्टिच्यूड म्यूजिक हलमा नोभेम्बर १९ तारिखका दिन नेपाली लोकरकको चीरपरिचित स्वर नेपथ्यले गुञ्जाउने छ।
ब्रिसबेनपछि नेपथ्यले उत्तरतर्फको डार्बिनमा नोभेम्बर २२ तारिखका दिन, एडिलेडमा डिसेम्बर ३, होबार्टमा डिसेम्बर ८, सिड्नीमा डिसेम्बर १४ मा प्रस्तुति दिएपछि अन्तिम प्रस्तुतिका लागि मेलवर्न पुग्नेछ। यस यात्राको अन्तिम कार्यक्रम मेलवर्नमा डिसेम्बर २३ का दिन हुनेछ।
नेपथ्यको यस वर्षको यात्रा संयोजन ‘नेपाली टच’ले गर्न लागेको हो। आफ्नो प्रिय ब्याण्डले फेरि अष्ट्रेलिया यात्रा गर्न थालेकोमा त्यहाँस्थित नेपालीहरू अत्यन्त खुसी रहेको ‘नेपाली टच’का दिपेश पुनले बताए। अष्ट्रेलियास्थित नेपाली टचको संयोजनमा नेपथ्यको कार्यक्रमहरूको स्थानीय आयोजना ब्रिसवेनमा माउन्ट ८८४८ इभेन्ट, डार्विनमा गोर्खा पल्टन, एडिलेडमा गिरिश एंड ३ KG इभेन्ट, होवार्टमा ताज इभेन्ट र मेलवर्नमा नेप्ले इभेन्ट ले गर्नेछ भने सिड्नीको आयोजना नेपाली टच आफैले गर्नेछ।
‘श्रोता दर्शकहरूको अपार माया पाउँदै आएको अष्ट्रेलियामा यात्राको सबै तयारी सम्पन्न भएको छ,’ नेपथ्यका गायक एवं अगुवा अमृत गुरुङ भन्छन्, ‘अस्ट्रेलियाका हरेक प्रस्तुतिलाई अविस्मरणीय बनाउने क्रममै पहिले कहिलै प्रस्तुत नगरेका केही गीत पनि यसपाला सुनाउने भएका छौं।’
आफ्नो घरपरिवार र समाजभन्दा टाढा रहेका नेपालीहरूलाई स्वदेशको माया पस्कने जानकारी पनि अमृतले दिए।
अमृतलाई यो यात्रामा पनि सधैंजस्तै ड्रमसेटमा ध्रुव लामा, किबोर्डमा सुरज थापा, गितारमा निरज गुरुङ, बेस गितारमा सुविन शाक्य र मादलमा शान्ति रायमाझीले सघाउने छन्।
कार्यक्रमको निर्माण पक्ष नेपालयले जिम्मा लिनेछ।