सुबिन भट्टराईको चर्चित उपन्यास ‘समर लभ’ मा आधारित सिनेमा ‘समर लभ’ यही फूलपातीबाट डिसहोम मार्फत सार्वजनिक हुने भएको छ। निर्देशक मुस्कान ढकालले फिल्म दसैंको अवसर पारेर स्याटालाइट मार्फत दर्शकमा जाने जानकारी दिए। ढकालका अनुसार फिल्म डिसहोमको च्यानल नम्बर ८ मा हेर्न सकिनेछ।
हलमा प्रदर्शन भएको लामो समयपछि फिल्म स्याटालाइटमा आउन लागेको हो। ढकालले दसैंमा फिल्म हेर्ने दर्शकको परम्परालाई जीवन्त राख्न टिभीमै भए पनि रिलिज गर्न लागेको जानकारी गराए।
‘दसैंमा नेपाली फिल्म हेर्ने दर्शक परम्परा रही आएको छ। यो साल महामारीका कारण नयाँ फिल्म रिलिज हुन सकेका छैनन्। दसैं खल्लो नहोस् भनेर हामीले टिभीमै भए पनि रिलिज गर्ने निर्णय गरेका हौं,’ मुस्कानले भने। दर्शकले २ सय २५ मा सपरिवार फिल्म हेर्न सक्नेछन्।
डिसहोमको प्रदर्शनपछि फिल्म म्याक्स प्लेयर र नेट टिभीमा पनि रिलिज गर्ने तयारी भइरहेको छ। मुस्कानले फिल्म तत्कालै युट्युबमा भने रिलिज नहुने जानकारी गराएका छन्।
सुरज सिंह ठकुरी, आशिष पिया, रेवती क्षेत्री, शिशिर भण्डारी आदि कलाकारको अभिनय रहेको फिल्म गत सालको माघ २५ मा हलमा रिलिज भएको थियो। फिल्ममा सञ्जय लामाको छायांकन र पुष्पन प्रधानको संगीत छ।