देशभरका सिनेमा हलमा यतिबेला नयाँ नेपाली फिल्मको खडेरी देखिएको छ।
फागुन २१ गते भएको प्रतिनिधिसभा निर्वाचनका कारण पनि धेरै निर्माताले फागुन महिनामा प्रदर्शन मिति तय गरेका थिएनन्।
एकाध फिल्म फागुनमा रिलिज भए पनि अपेक्षित व्यापार गर्न सकेनन्। सोहीकारण हल पुरानै फिल्मको भरमा चलिरहेका छन्।
नेपालकै ठूलो मल्टिप्लेक्स चेन क्युएफएक्समा नेपालीतर्फ 'आबाट आमा' र 'रमिताको पिरती' प्रदर्शनरत छन्। यी दुवै माघमा रिलिज फिल्महरू हुन्।
गत शुक्रबार रिलिज 'प्रवासी जीवन' भने क्युएफएक्सका अधिकांश चेनबाट उत्रिसकेको छ। क्युएफएक्सका पर्दामा विदेशीतर्फ विभिन्न विधाका फिल्म प्रदर्शन भइरहेका छन्। बलिउडको 'ओ रोमियो' का साथै अंग्रेजी फिल्महरू 'क्राइम १०१', 'वुदरिङ हाइट्स', 'स्क्रिम ७' प्रदर्शनरत छन्।
दोस्रो ठूलो मल्टिप्लेक्स आइएनआइमा भने नेपालीतर्फ 'आबाट आमा' मात्र प्रदर्शनरत छ। वान सिनेमाजमा 'आबाट आमा' र 'रमिताको पिरती' सहित 'प्रवासी जीवन' पनि प्रदर्शनरत देखिन्छ।
त्यस्तै बिग मुभिजमा 'आबाट आमा', 'रमिताको पिरती' सहित 'कुमारी' पनि चलिरहेको छ।
यसैबीच नयाँ रिलिज 'प्रवासी जीवन' रिलिजको केही दिनमै धेरैजसो हलबाट उत्रिसक्दा 'आबाट आमा' शुक्रबार ३६ औं दिनमा प्रदर्शनरत छ। 'प्रवासी जीवन' को आधिकारिक बक्स अफिस कमाइ भने सार्वजनिक भइसकेको छैन। 'आबाट आमा' ले भने गत शनिबारसम्म १२ करोड २३ लाख ग्रस कमाइ गरेको थियो। त्यसयताको कमाइ सार्वजनिक गरिएको छैन।
माघ २३ मा रिलिज 'रमिताको पिरती' र 'कुमारी' धेरै हलबाट उत्रिसकेका छन्। पछिल्लो विवरणअनुसार 'कुमारी' ले बक्स अफिसमा ६४ लाख ४८ हजार रूपैयाँ ग्रस कमाइ गरेको छ भने 'रमिताको पिरती' को कमाइ २८ लाख ६८ हजार रूपैयाँ हाराहारी छ।
अब नयाँ नेपाली फिल्म आउँदो शुक्रबार रिलिज हुनेछ। फागुन २९ गते फिल्म 'लालिमा' प्रदर्शन तय छ।
-1746009348.jpg)
