अन्तर्राष्ट्रिय नारी दिवसको अवसरमा नारीप्रधान फिल्म 'टिका- द स्टेटलेस सोल' को निर्माण घोषणा गरिएको छ। भविष्य खड्का फिल्मस् प्रा.लिको प्रस्तुतिमा थर्ड आइ आट्र्स प्रालिसँगको सहकार्यमा फिल्म निर्माण हुन लागेको हो।
नेपाली समाजमा महिलाले भोग्ने संघर्ष, आत्मसम्मान, अस्तित्व र आत्मनिर्भरताको कथा प्रस्तुत गर्ने फिल्म शंकर कार्कीले निर्देशन गर्नेछन्।
आइतबार निर्माण घोषणासहित सार्वजनिक गरिएको फिल्मको थीम पोस्टरमा 'टिका' लाई रातो रंगको गोलाकारभित्र सेतो अक्षरमा लेखिएको देखिन्छ। जसले फिल्ममा समेटिने संघर्ष, पराक्रम र नैतिक स्वच्छताको संकेत गर्छ।
सुपरहिट फिल्म 'जेरी अन टप' निर्मात्री भविष्य खड्का निर्माता रहेको यो फिल्ममा प्रमुख कलाकारको भूमिकामा महेश त्रिपाठी, ऋचा शर्मा, वर्षा शिवाकोटी र हास्य कलाकार निर्मल शर्मा अनुबन्धित भइसकेका छन्।
साथै, बाल कलाकार आयुशी ढकाल पनि प्रमुख अभिनयमा रहनेछिन्। अन्य कलाकार र प्राविधिकहरू छनोटको चरणमा रहेको फिल्मका कार्यकारी निर्माता तेजविक्रम केसीले बताए।
फिल्मको कथा चन्दन झा र निर्देशक कार्कीले तयार पारेका हुन् भने पटकथा रामकुमार श्रेष्ठले लेखेका छन्।
निर्माण टिमका अनुसार सम्पूर्ण 'कास्ट एण्ड क्रू' तय भइसकेपछि फिल्मको छायांकन प्रारम्भ हुने र सोही समयमा प्रदर्शन मिति समेत सार्वजनिक गरिने निर्माण टिमले बताएको छ।
-1746009348.jpg)
