बलिउड अभिनेता शाहरूख खानको बहुप्रतीक्षित फिल्म 'किङ' को नयाँ पोस्टर सार्वजनिक भएको छ।
मंगलबार सार्वजनिक पोस्टरमा शाहरूखलाई फरक र खतरनाक अवतारमा देखाइएको छ। पोस्टरमा उनको लुक्सले फिल्म एक्सनप्रधान हुने संकेत गर्छ।
पोस्टरमा शाहरूखको कपाल फुलेको देखिन्छ भने अनुहारमा दाह्री र आँखामा आक्रामक भाव छ। उनले पुरानो शैलीको ल्यादरको ज्याकेट र खुला सर्ट लगाएका छन्। एक हातमा बन्दुक बोकेका उनी मुखमा रातो गुलाब च्यापेर आगोको लप्काबीच अगाडि बढिरहेको देखिन्छन्।
शाहरूखले सामाजिक सञ्जालमा पोस्टर सार्वजनिक गर्दै लेखेका छन्, 'आज फेरि याद आयो, हत्यारा होइन, म प्रेमी हुँ।' उनको यो संवादले सन् १९९९ मा प्रदर्शन भएको फिल्म 'बादशाह' को चर्चित शीर्ष गीतलाई सम्झाउँछ। यसले शाहरूखको पुरानो रोमान्टिक छविलाई नयाँ एक्सन अवतारसँग जोडेको छ।
सिद्धार्थ आनन्द निर्देशित 'किङ' आगामी डिसेम्बर २४ (पुस ९) देखि सिनेमाघरमा प्रदर्शन हुँदैछ।
फिल्ममा शाहरूखसँगै उनकी छोरी सुहाना खान, दीपिका पादुकोण, अभिषेक बच्चन, रानी मुखर्जीलगायत कलाकारको अभिनय छ।
