रजनीकान्त अभिनीत भारतीय फिल्म 'जेलर–२' ले विश्वव्यापी बक्स अफिसमा ६२८ करोड भारूभन्दा बढी कमाएको छ।
योसँगै फिल्म सर्वाधिक कमाइ गर्ने टप–२० भारतीय फिल्मको सूचीमा परेको छ।
जेलर–२ ले प्रदर्शनको नवौं दिनसम्म यो कमाइ गरेको हो।
दि इकोनोमिक टाइम्सका अनुसार जेलर–२ ले प्रदर्शनको पहिलो सातामै ५०० करोड भारू कमाएको थियो।
यसले प्रभास अभिनीत 'सलार' र सलमान खानको 'सुल्तान' को कुल कमाइलाई समेत उछिनेको छ।
जेलर–२ को सफलताको एउटा प्रमुख कारण रजनीकान्तको लोकप्रियता हो। दक्षिण भारतीय फिल्मका चर्चित अभिनेतामध्येका रजनीकान्तको फिल्मलाई लिएर दर्शकमा पहिल्यै चासो थियो।
सन् २०२३ मा प्रदर्शन भएको 'जेलर' सफल भएकाले त्यसको दोस्रो भागप्रति पनि दर्शकको अपेक्षा उच्च थियो।
फिल्ममा रजनीकान्त अवकाशप्राप्त जेलर टाइगर मुथुवेल पाण्डियनकै भूमिकामा फर्किएका छन्।
नेल्सन दिलीपकुमार निर्देशित फिल्ममा राम्या कृष्णन र योगी बाबुसहित अघिल्लो भागका केही कलाकार दोहोरिएका छन्। एसजे सूर्याह, मिथुन चक्रवर्ती र विद्या बालन पनि फिल्ममा छन्।
त्यस्तै, मोहनलाल, शिव राजकुमार र ज्याकी श्रफको विशेष उपस्थितिले पनि फिल्मप्रति दर्शकको चासो बढाएको छ। एक्सन, रजनीकान्तको प्रभावशाली प्रस्तुति र अनिरूद्ध रविचन्दरको संगीत फिल्मका अन्य आकर्षण हुन्।
फिल्मले भारतबाहिर पनि राम्रो कमाइ गरेको छ। विदेशमा रहेका भारतीय दर्शक र दक्षिण भारतीय फिल्मका अन्तर्राष्ट्रिय प्रशंसकबाट प्राप्त साथले यसको विश्वव्यापी व्यापार बढाउन मद्दत गरेको देखिन्छ।
अब जेलर–२ ले रजनीकान्तकै अर्को फिल्म '२.०' को विश्वव्यापी कमाइ उछिन्ने अनुमान छ। २.० ले करिब ६९१ करोड भारू कमाएको थियो।
