अस्ट्रेलियाको मेलबर्नमा एभरेस्ट सकर मिट २०२६ फुटबल प्रतियोगिता आयोजना हुने भएको छ।
आगामी शनिबार र आइतबार आयोजना हुने प्रतियोगितामा तीन विधामा १६ टोलीले प्रतिस्पर्धा गर्नेछन्।
मेलबर्नस्थित आयोजक एभरेस्ट युनाइटेड क्लबका अनुसार प्रतियोगिता सियरा ओपन कप, एलायन्स वाइज कप र ग्रेस योङ गन्स कप गरी तीन विधामा सञ्चालन हुनेछ।
आयोजक क्लबका संयोजक मोहन हमालका अनुसार सियरा ओपन कपमा ६ टोली सहभागी हुनेछन्।
त्यस्तै, ३५ वर्ष वा सोभन्दा माथिका खेलाडी सहभागी हुने एलायन्स वाइज कपमा पनि ६ टोलीले प्रतिस्पर्धा गर्नेछन्।
१० देखि १४ वर्ष उमेर समूहका खेलाडी सहभागी हुने ग्रेस योङ गन्स कपमा भने चार टोलीबीच प्रतिस्पर्धा हुनेछ।
सियरा ओपन कप र एलायन्स वाइज कप इलेभेन ए साइडमा खेलाइनेछ भने योङ गन्स कप नाइन ए साइडमा सञ्चालन हुनेछ।
मेलबर्नको होपर क्रसिङमा आयोजना हुने प्रतियोगिताले नयाँ फुटबल प्रतिभाको पहिचान गर्नुका साथै विभिन्न सांस्कृतिक तथा सामाजिक पृष्ठभूमिका समुदायलाई एकै ठाउँमा जोड्ने आयोजकको विश्वास छ।ब
प्रतियोगिताको मुख्य उद्देश्य फुटबलमार्फत आपसी भाइचारा, चिनजान र सामुदायिक सम्बन्धलाई थप सुदृढ बनाउनु रहेको संयोजक हमालले बताए।
पछिल्लो समय अस्ट्रेलियाको मेलबर्न नेपाली फुटबल गतिविधिको केन्द्रका रूपमा विकसित हुँदै गएको छ।
वर्षभरि आयोजना हुने विभिन्न प्रतियोगिताले नेपाली युवा खेलाडीलाई आफ्नो प्रतिभा प्रदर्शन गर्ने अवसर प्रदान गर्नुका साथै स्थानीय फुटबलमा स्थापित हुन प्रोत्साहन गरिरहेका छन्।
एभरेस्ट सकर मिटले पनि यस अभियानलाई थप ऊर्जा दिने अपेक्षा गरिएको छ।