अर्थमन्त्री डा. युवराज खतिवडाले भारतीय रुपैयाँ पाँच सय र एक हजारको नोट सटही सम्बन्धमा नेपालमा देखिएको समस्या समाधानका लागि पहल गर्न भारत सरकारसँग अनुरोध गरेका छन्।
भारतमा आयोजित विश्व आर्थिक मञ्चको कार्यक्रममा सहभागी अर्थमन्त्री खतिवडाले भारत सरकारका वित्त मन्त्री निर्मला सितारमणसमक्ष ठूला दुई नोट प्रचलनमा बन्देज लगाउनु अघि नेपालमा सङ्कलित भारुको सटही सम्बन्धमा देखिएको समस्या समाधानका लागि पहल गरेका हुन्।
'भारत सरकारले भारु ५ सय र १ हजारका नोट प्रचलनमा बन्देज लगाउनु भन्दा पहिले नेपालमा मौज्दात भारु ५ करोडको सटही सम्बन्धमा देखिएको समस्या समाधानका लागि पहल गर्न अनुरोध गर्दछु' उनले भनेको कुरालाई उदृत गर्दै जारी प्रेस विज्ञप्तिमा उल्लेख छ।
खतिवडाले भारतबाट नेपालतर्फ जाने व्यक्तिहरुले आफूसँग लैजान पाउने ठूला दरका भारु नोटहरु फर्काउने सम्बन्धमा द्विविधा भएकाले त्यसलाई स्पष्ट हुने गरी आवश्यक सूचना जारी गरिदिन समेत अनुरोध गरेका छन्।
भारत सरकारका वित्त मन्त्री सितारमणले विगतको भारु नोट प्रचलनमा भएको बन्देज र भारु नोट प्रयोगका क्रममा उत्पन्न समस्यालाई दुबै देशको सहमतिमा समाधान गरिने बताइन्। उनले नेपाल भारत बीचको सम्बन्ध सदियौदेखि भएको उल्लेख गर्दै आगामी दिनमा सहायतालाई बढाउने जानकारी समेत दिइन्।
कार्यक्रमका अवसरमा नेपाल र भारत सरकारबीच द्विपक्षीय आर्थिक सहयोग, व्यापार र लगानीका विषयमा छलफल भएको छ।
--1715160207.JPG)
