पाकिस्तानको हबिब बैंकले हिमालयन बैंकमा रहेको आफ्नो सेयर बेच्ने भएको छ।
हबिबले हिमालयनमा रहेको आफ्नो १२.९३ प्रतिशत बेच्ने तयारी गरेको हो।
हबिब बैंकले आफ्नो स्वामित्वमा रहेको सेयर हिमालयन रि-इन्स्योरेन्सलाई बिक्री गर्ने तयारी गरेको बैंकका प्रमुख कार्यकारी अधिकृत अशोक राणाले पुष्टि गरेका छन्।
‘यो आजदेखिको तयारी होइन। यसपटक फेरि पनि राष्ट्र बैंकसमक्ष हबिबले सेयर बिक्रीका लागि आवेदन दिएको छ,’ राणाले भने।
गत शुक्रबार हबिब र हिमालयन रि-इन्स्योरेन्सबीच सेयर खरिद-बिक्रीको सम्झौता भएको हो। बैंकको सेयर प्रतिकित्ता १ सय ३० रूपैयाँको दरमा बिक्री हुन लागेको बुझिएको छ।
हबिब बैंकले आफ्नो स्वामित्वमा रहेको सेयर २०७६ सालमा नै बिक्री गर्ने प्रयास गरेको थियो। सो समय बेलायतको कमनवेल्थ डेभलपमेन्ट कर्पोरेसन ग्रुप (सिडिसी) ले सेयर खरिद गर्ने पक्का भएको थियो। तर सो समय बैंककै एक सञ्चालकबाट अवरोध भएपछि सफल हुन सकेको थिएन। पछि कर्मचारी सञ्चय कोषले समेत सो सेयर किन्ने बताएको भए पनि सो प्रयास समेत सफल हुन सकेन।
सिभिल बैंकसँगको मर्जरपछि अहिले सेयर बिक्री गर्दा हबिब बैंकले पुँजीगत लाभकर छुट समेत पाउने छ। यही कारण राष्ट्र बैंकले तत्कालै यो बिक्रीलाई स्वीकृति नदिने सम्भावना पनि देखिएको छ।
आर्थिक ऐन २०८० को संशोधनसहितको आयकर ऐन-२०५८ ले गाभिएर २०८० सालभित्र कारोबार सुरू गर्ने बैंक तथा वित्तीय संस्था लगायतमा रहेको सेयर दुई वर्षसम्म बिक्री गर्दा पुँजीगत लाभकर नलाग्ने व्यवस्था गरेको छ। सरकारको राजस्व गुमिरहेको कारण हबिबले बिक्रीका लागि मागेको स्वीकृति नदिन सक्ने सम्भावना छ।
हाल हिमालयन बैंकको चुक्ता पुँजी २१ अर्ब ६५ करोड रूपैयाँ छ। सिभिलसँग मर्जरअघि हिमालयनमा २० प्रतिशत स्वामित्व रहेको हबिबको हाल १२.९६ प्रतिशत स्वामित्व छ।
