आइतबार सेयर बजार परिसूचक नेप्से ३१ अंकले बढेर २६७२ विन्दुमा पुग्यो।
कारोबारमा आएका समूहगत परिसूचकमध्ये वित्त कम्पनी (फाइनान्स) समूह ५.७३ प्रतिशतले बढेर २५६२ विन्दुमा पुग्यो।
बजारमा कुल आठ अर्ब ४० करोड रूपैयाँको कारोबार हुँदा फाइनान्स समूहको मात्रै एक अर्ब २१ करोड रूपैयाँको कारोबार भएको हो।
त्यस्तै धेरै मूल्य बढ्ने पाँच कम्पनीमा दुइटा वित्त कम्पनी पनि अग्रस्थानमा छन्।
यी हुन्, गोर्खाज फाइनान्स र सेन्ट्रल फाइनान्स।
गोर्खाजको मूल्य १० प्रतिशतले बढेर सर्किट ब्रेक नै लाग्यो, मूल्य ५६२ रूपैयाँ पुग्यो।
त्यस्तै, सेन्ट्रलको मूल्य ८.८८ प्रतिशतले बढेर ५५५ रूपैयाँ पुग्यो।
गोरखा फाइनान्स पहिले गोर्खा विकास बैंकको नामबाट सञ्चालनमा थियो। २०६७ चैतमा यो समस्याग्रस्त घोषणा भयो। विभिन्न संस्थासँगको मर्जरपछि २०७२ चैतबाट गोर्खाज फाइनान्सको नामबाट यो संस्था पुनः सञ्चालनमा आएको हो।
त्यसयता सधैं नाफामा देखिँदै गएको गोरखा फाइनान्स आर्थिक वर्ष २०८१/८२ को दोस्रो त्रैमासबाट नोक्सानमा छ।
चालु आर्थिक वर्ष २०८२/८३ को पहिलो त्रैमासमा यो चार करोड २४ लाख रूपैयाँ नोक्सानमा छ।
चालु आर्थिक वर्ष २०८२/८३ को दोस्रो त्रैमासको वित्तीय विवरण सार्वजनिक हुने समय नजिकिँदैछ। त्यसैले पनि वित्तीय विवरणमा सुधार हुने अपेक्षा लगानीकर्ताहरूमा रहेकाले अहिले यसको सेयरमा आकर्षण बढेको मान्न सकिन्छ।
तर गोर्खाजको सञ्चित नोक्सान ६६ करोड रूपैयाँ छ। यसले यही बराबरको रकम नाफा कमाएर सञ्चिति धनात्मक बनाएपछि मात्रै लाभांश दिन सक्ने अवस्था हुनेछ।
अघिल्लो पटक आर्थिक वर्ष २०७१/७२ मा अन्तिम पटक गोर्खाजले ७ प्रतिशत बोनस सेयर दिएको थियो। त्यसयता लगानीकर्ताको हात खाली बनाउँदै आएको छ।
सोही ताका यसले दुई कित्ता बराबर एक कित्ता हकप्रद सेयर जारी गरेको थियो।
२०८१ साउनमा गोर्खाज १०४१ रूपैयाँमा कारोबार भएको थियो। आइतबार गोर्खाजको कारोबारमा आएको सेयर संख्या पनि बढेको छ। अघिल्लो कारोबार दिन, बुधबार, २१ हजार कित्ता सेयर किनबेच भएकामा आइतबार ९४ हजार कित्ता कारोबार भएको छ।
सेयर मूल्यले लामो हरियो मैनबत्ती आकृति बनाएको छ। यसले खरिदकर्ता बढेको र मूल्य बढ्न सक्ने संकेत गर्छ। आइतबार बढेर ५६२ रूपैयाँ पुगे पनि सेयर मूल्यले ५७२ रूपैयाँ आसपास प्रतिरोध पाउने रेखाचित्रले देखाउँछ।
गत कात्तिकमा ५७२ रूपैयाँमा प्रतिरोध पाएर यसको मूल्य घट्दो क्रममा थियो।
गोर्खाजको प्रति सेयर नेटवर्थ १३३ रूपैयाँ छ। कुल ८६ लाख कित्ता सेयर रहेको यसको मात्रै ४२ लाख कित्ता सेयर सर्वसाधारणसँग छ। कम चुक्तापुँजी भएकैले पनि गोर्खाजले लामोदेखि लाभांश नदिए पनि मूल्य धेरै समयदेखि ५०० रूपैयाँ आसपासमा टिकिरहेको छ।
त्यस्तै २०५३ सालबाट सञ्चालनमा आएको सेन्ट्रल फाइनान्सले २०७३ सालमा भक्तपुर फाइनान्ससँग मर्जर गरेको थियो।
विगतमा राम्रो लाभांश दिने कम्पनी मानिने यसले आर्थिक वर्ष २०७७/७८ देखि दिन सकेको छैन। आर्थिक वर्ष २०७१/७२ र २०७२/७३ मा सेन्ट्रलले २५ देखि ३५ प्रतिशतसम्म लाभांश दिएको थियो।
आर्थिक वर्ष २०८०/८१ मा यो ६ करोड रूपैयाँ नोक्सानमा देखिएको थियो। त्यसयता सेन्ट्रल नाफामै छ।
तर यसको सञ्चित नोक्सान आर्थिक वर्ष २०८०/८१ मा ११ करोड रूपैयाँ थियो। चालु आर्थिक वर्ष २०८२/८३ को पहिलो त्रैमासमा यस्तो सञ्चित नोक्सान बढेर ३० करोड रूपैयाँ पुगेको छ।
यसले यही बराबरको रकम नाफा कमाएर सञ्चिति धनात्मक बनाएपछि मात्रै लाभांश दिन सक्ने अवस्था हुनेछ।
चालु आर्थिक वर्ष २०८२/८३ मा सेन्ट्रलले एक करोड ८४ लाख रूपैयाँ नाफा कमाएको छ। यसको खुद ब्याज आम्दानी पाँच करोड ५३ लाखबाट घटेर तीन करोड ३७ लाख रूपैयाँ भएको छ।
सेन्ट्रलको वार्षिकीकरण गरिएको प्रति सेयर आम्दानी सात रूपैयाँ ७८ पैसा र प्रति सेयर नेटवर्थ १३३ रूपैयाँ छ।
पछिल्लो समय २०८१ भदौमा सेन्ट्रलको सेयरले ८१६ रूपैयाँको उचाइ भेटेको थियो।
बुधबार र आइतबार दुवै दिनमा लामो हरियो मैनबत्ती आकृति बनाएको छ।
गत साउन ७ गते यसले ६०८ रूपैयाँ आसपास प्रतिरोध पाएको थियो। अहिले ५५५ रूपैयाँमा कारोबार भएको सेन्ट्रलको सेयर मूल्यले त्यहीँ प्रतिरोध सामान गर्न सक्छ।
-1746009348.jpg)
