नेपाल धितोपत्र बोर्डले २५ लाख रूपैयाँदेखि लगानी गर्न सकिने गरी वैकल्पिक लगानी कोष नियमावली, २०८३ को मस्यौदा सार्वजनिक गरेको छ।
मस्यौदामा प्राइभेट इक्विटी, भेन्चर क्यापिटल, स्टार्टअप तथा साना तथा मझौला उद्यममा लगानी गर्न सकिने व्यवस्था प्रस्ताव गरिएको छ।
बोर्डले लगानीका नयाँ क्षेत्र विकास गर्ने र दीर्घकालीन पुँजी परिचालन बढाउने उद्देश्यले नियमावलीको मस्यौदा तयार पारेको जनाएको छ।
यस मस्यौदा माथि बोर्डले सरोकारवालासँग राय तथा सुझावसमेत माग गरेको छ।
मस्यौदाअनुसार सामान्यतया एउटा लगानीकर्ताले कम्तीमा ५० लाख रूपैयाँ लगानी गर्नुपर्नेछ।
तर, भेन्चर क्यापिटल, साना तथा मझौला उद्यम, सामाजिक प्रभाव र एन्जल फन्डमा २५ लाख रूपैयाँबाटै लगानी गर्न सकिनेछ।
यस्ता कोषको अवधि न्यूनतम पाँच वर्ष र अधिकतम १५ वर्षसम्म हुने उल्लेख गरिएको छ।
एउटा कोषको न्यूनतम आकार १५ करोड रूपैयाँ हुनुपर्ने प्रस्ताव छ।
प्रत्येक कोषमा अधिकतम २०० जना लगानीकर्ता रहन सक्नेछन्।
लगानीकर्ताले सुरूमै सबै रकम जम्मा गर्नुपर्ने भने छैन।
प्रतिबद्धता जनाएपछि कोषको आवश्यकताअनुसार चरणबद्ध रूपमा रकम माग गर्न सकिने व्यवस्था गरिएको छ।
कोषले १२ महिनाभित्र पहिलो चरणको पुँजी संकलन र २४ महिनाभित्र अन्तिम चरणको पुँजी संकलन गरिसक्नुपर्ने प्रस्ताव छ। कोष व्यवस्थापकले पनि सम्बन्धित कोषमा कम्तीमा दुई प्रतिशत लगानी गर्नुपर्नेछ।
कोषमा बैंक तथा वित्तीय संस्था, बीमा कम्पनी, अवकाश तथा सामाजिक सुरक्षा कोष, विदेशी लगानीकर्ता, नेपाली नागरिक र गैरआवासीय नेपालीले लगानी गर्न सक्नेछन्।
सार्वजनिक निष्कासन नगरी लक्षित लगानीकर्तालाई निजी प्रस्तावमार्फत इकाई बिक्री गरिने व्यवस्था गरिएको छ।
लगानीको जोखिम घटाउन एउटा कम्पनी वा क्षेत्रमा कोषको कुल लगानीयोग्य रकमको अधिकतम २५ प्रतिशतसम्म मात्रै लगानी गर्न पाइने प्रस्ताव छ।
निश्चित क्षेत्रमा मात्र लगानी गर्ने कोषलाई भने यसमा छुट दिन सकिनेछ।
कोष व्यवस्थापकले यस्तो कोष सञ्चालन गर्नुअघि बोर्डको पूर्वस्वीकृति लिनुपर्नेछ। कम्पनी स्थापना गरी अनुमतिपत्र लिनुपर्ने व्यवस्था छ।
कोष व्यवस्थापकको न्यूनतम चुक्ता पुँजी पाँच करोड रूपैयाँ हुनुपर्ने प्रस्ताव गरिएको छ।