बुटवल उद्योग वाणिज्य संघको आगामी नेतृत्वको लागि सोमबार चुनाव हुँदैछ।
शुक्रबारदेखि सुरु भएको संघको ७३औं साधारण सभा तथा २६औं अधिवेशनअन्तर्गत सोमबार नेतृत्व चयनका लागि निर्वाचन हुन लागेको हो।
निर्वाचनमा उद्योगी नरिस्वर शर्मा पौडेल र व्यवसायी टंकप्रसाद गैरे नेतृत्वका दुई प्यानल प्रतिस्पर्धामा ओर्लिएपछि बुटवलको व्यावसायिक क्षेत्र चुनावमय बनेको छ।
१ हजार ८०० भन्दा बढी सदस्य रहेको संघको नेतृत्व हात पार्न दुवै प्यानलका उम्मेदवार मतदाताको मन जित्ने प्रयासमा जुटेका छन्।
विगतमा एउटै प्यानलबाट प्रतिस्पर्धा गर्ने गरेका व्यवसायीहरू यसपटक दुई फरक प्यानल बनाएर निर्वाचनमा ओर्लिएपछि सदस्य उद्योगी–व्यवसायीले पनि यसलाई चासोका साथ हेरेका छन्।
अध्यक्षसहित विभिन्न पदमा उम्मेदवारी दिएका व्यवसायीहरू आफ्ना पक्षमा मत जुटाउन सदस्यहरूको घरदैलोमा पुगिरहेका छन्।
उम्मेदवारहरूको दौडधुप, भेटघाट र मत माग्ने शैलीले चुनावी गतिविधि तीव्र बनेको छ। उनीहरूको चुनावी दौडधुपले राजनीतिक दलका उम्मेदवारहरू संसदीय निर्वाचनमा मत माग्न घरदैलोमा पुगेको झल्को दिएको छ।
संघको नेतृत्व चयनलाई व्यवसायीहरूले आफ्नो व्यावसायिक हितसँग जोडेर हेर्ने गरेका छन्।
त्यसैले नेतृत्वमा पुग्न चाहने उम्मेदवारहरूलाई सदस्यहरूको विश्वास जित्नुपर्ने चुनौती छ। आगामी कार्यकालमा नेतृत्व सम्हाल्न दुवै प्यानल मतदातासँग प्रत्यक्ष संवाद र भेटघाटमा केन्द्रित भएका छन्।
दुवै समूहले विभिन्न पदमा उम्मेदवार अघि सार्दै सदस्यहरूको समर्थन जुटाउने प्रयास गरिरहेका छन्। निर्वाचनमा अध्यक्षसहित वरिष्ठ उपाध्यक्ष, उद्योग उपाध्यक्ष, वाणिज्य उपाध्यक्ष, महासचिव, कोषाध्यक्ष, सचिव र सहकोषाध्यक्षका साथै १८ जना कार्यसमिति सदस्यका लागि प्रतिस्पर्धा हुँदैछ।
नरिस्वर शर्मा पौडेल नेतृत्वको प्यानलबाट वरिष्ठ उपाध्यक्षमा सुरज भट्टराई उम्मेदवार छन्। उद्योग उपाध्यक्षमा निर्मित कसजु र वाणिज्य उपाध्यक्षमा बाबुराम विश्वकर्माले उम्मेदवारी दिएका छन्।
त्यस्तै, महासचिवमा वसन्तप्रसाद ढकाल, कोषाध्यक्षमा प्रतीक पोखरेल, सचिवमा दीपकप्रसाद चापागाईँ र सहकोषाध्यक्षमा कमला पोखरेल पराजुली उम्मेदवार बनेकी छन्।
अर्कोतर्फ, टंकप्रसाद गैरे नेतृत्वको प्यानलबाट वरिष्ठ उपाध्यक्षमा विमलराज भट्टराई उम्मेदवार छन्। उद्योग उपाध्यक्षमा दिनेश श्रेष्ठ र वाणिज्य उपाध्यक्षमा मुक्तिप्रसाद अधिकारी प्रतिस्पर्धामा छन्। त्यस्तै, महासचिवमा जमुना पौडेल, कोषाध्यक्षमा टीकाराम बन्जाडे, सचिवमा काशीराम शर्मा पौडेल र सहकोषाध्यक्षमा जाकिर हुसेन उम्मेदवार छन्।
निर्वाचन हुन एक दिन बाँकी रहँदा दुवै पक्षले आफ्ना प्रतिबद्धता र एजेन्डासहित मतदातासँगको प्रत्यक्ष सम्पर्कलाई प्राथमिकतामा राखेका छन्। पौडेल नेतृत्वको प्यानलले २० बुँदे र गैरे नेतृत्वको प्यानलले १० बुँदे प्रतिबद्धतासहित बजारको मन्दी, व्यवसायीको सुरक्षा, पूर्वाधार र आर्थिक समृद्धिलाई प्रमुख एजेन्डा बनाएका छन्।
दुवै समूहले बुटवलको व्यापारिक र औद्योगिक भविष्यलाई कुन दिशामा अघि बढाउने, खस्किँदो व्यापारलाई कसरी पुरानै लयमा फर्काउने र व्यवसायीका समस्या समाधान गर्न संघलाई कसरी प्रभावकारी बनाउने भन्ने प्रश्नलाई केन्द्रमा राखेर चुनावी प्रतिबद्धता सार्वजनिक गरेका छन्।
‘बुटवलमा खस्किँदै गएको व्यापारलाई पुरानै लयमा फर्काउने विषयलाई हामीले प्रमुख प्राथमिकतामा राखेका छौँ। सरकारसँग सहकार्य गर्दै उद्यमशीलता प्रवर्द्धन, व्यवसायमैत्री वातावरण निर्माण र व्यवसायीका समस्या समाधान गर्नु हाम्रो प्रमुख काम हुनेछ,’ अध्यक्षका प्रत्याशी नरिस्वर शर्मा पौडेल भन्छन्।
व्यवसाय दर्ता, नवीकरण र प्रशासनिक प्रक्रियालाई सरल, छिटो तथा पारदर्शी बनाउनुका साथै बन्द हुने वा विस्थापनको जोखिममा रहेका उद्योग–व्यवसायको संरक्षणका लागि पहल गर्ने उनले बताए। डिजिटल भुक्तानी तथा अनलाइन व्यापारलाई प्रोत्साहन गर्ने, युवा तथा नयाँ उद्यमीलाई प्रोत्साहित गर्ने, साना तथा मझौला व्यवसायको संरक्षण गर्ने, महिला उद्यमीको पहुँच विस्तार गर्ने, लगानी प्रवर्द्धन गर्ने र संस्थागत पारदर्शितामा जोड दिने योजना रहेको पौडेलले बताए।
टंकप्रसाद गैरे नेतृत्वको प्यानलले उद्योगी–व्यवसायीका समस्या समाधान गर्न संघलाई औपचारिक संस्थामा सीमित नराखी भरोसायोग्य सहयोगी र समस्या समाधानको साझा मञ्चका रूपमा विकास गर्ने प्रतिबद्धता जनाएको छ।
गैरे प्यानलले सार्वजनिक गरेको १० बुँदे प्रतिबद्धतामा संयुक्त तथा समावेशी नेतृत्व, व्यवसायीको सम्मान र संरक्षण, व्यवसायमैत्री नीति, लगानी तथा उद्योगको सुरक्षा र बुटवलको पूर्वाधार विकासलाई प्राथमिकता दिइएको छ।
‘बढ्दो व्यावसायिक लागत, बजारको मन्दी, अव्यवस्थित पूर्वाधार, नीतिगत अस्पष्टता र अस्वस्थ प्रतिस्पर्धाले सबै क्षेत्रको व्यवसाय प्रभावित भइरहेको छ। हामीले व्यवसाय सञ्चालनमा देखिएका यस्ता समस्या समाधानका लागि प्रभावकारी पैरवी गर्नेछौँ,’ गैरेले भने।
उनले बजार विस्तार, उत्पादन तथा निर्यात प्रवर्द्धन, डिजिटल र आधुनिक व्यवसायको विकास, युवा तथा महिला उद्यमशीलतामा पहुँच विस्तार र पर्यटनमार्फत स्थानीय अर्थतन्त्र बलियो बनाउन पहल गर्ने बताए।
बुटवल उद्योग वाणिज्य संघको इतिहास ७३ वर्ष पुरानो छ। २०१० सालमा ‘बुटवल व्यापार संघ’ का रूपमा स्थापना भएको यस संस्थाको संस्थागत पहलका लागि २००९ सालमै तदर्थ समिति गठन गरिएको थियो। संस्थापक अध्यक्ष पदमचन्द्र श्रेष्ठले २०१६ सालसम्म नेतृत्व गरेर संघको संस्थागत विकासको सुरुवात गरेका थिए।
स्थापनाकालमा व्यापारिक गतिविधि र व्यवसायीको हकहितसँग जोडिएर अघि बढेको बुटवल उद्योग वाणिज्य संघ समयक्रममा उद्योग, वाणिज्य तथा स्थानीय आर्थिक विकासका सवालमा सक्रिय संस्थाका रूपमा विकसित भयो। अहिले यो निजी क्षेत्रको प्रतिनिधित्व गर्ने यस क्षेत्रको सबैभन्दा जेठो संस्थाका रूपमा स्थापित छ।
उद्योगी–व्यवसायीको हकहित संरक्षण, व्यापार तथा उद्योग प्रवर्द्धन र क्षेत्रको आर्थिक तथा सामाजिक विकासमा योगदान पुर्याउँदै आएको यस संघको नेतृत्व चयनलाई संस्थाका सदस्यहरूले मात्र होइन, अन्य व्यावसायिक संघसंस्था र सर्वसाधारणले समेत चासोका साथ हेर्ने गरेका छन्।
