खरिदारको तलब भत्ता अब करिब ५७ हजार, मुख्यसचिवको कति पुग्छ?

यसरी हुन्छ हिसाब

भागवत भट्टराई

काठमाडौं, जेठ १५

सरकारले कर्मचारीलाई आकर्षित गर्न उल्लेखनीय तलब वृद्धि गरेको छ।

चार वर्षदेखि तलब नबढेकोमा यसपालिको बजेटमा सरकारले कमर्चारीको करिब २१ प्रतिशतले तलब वृद्धि गरेको हो।

सरकारी सेवामा कार्यरत कर्मचारीले लामो समयदेखि तलब नबढेको भन्दै गुनासो गर्दै आएका थिए।

अर्थमन्त्री स्वर्णिम वाग्लेले पेन्सनरहरूको दायित्व वृद्धि कम र कार्यरत कर्मचारीलाई प्रोत्साहन गर्ने सुत्र लगाएर तलब भत्ता बढाएका हुन्।

अब बढेको तलब अनुसार एक खरिदारको मासिक तलब भत्ता ५६ हजार ८७४ रूपैयाँ पुगेको छ। त्यस्तै मुख्य सचिवको एक लाख ४ हजार ८७ पुगेको छ।

कसको कति र कसरी?

मुख्यसचिव

हाल मुख्य सचिवले ग्रेड र भत्ता बाहेक मासिक ७७ हजार २११ रूपैयाँ तलब प्राप्त गर्ने गरेका थिए।

सरकारले सबै सरकारी कर्मचारीको एकमुष्ट १० प्रतिशतले तलब वृद्धि गरेसँगै ७ हजार २२१ रूपैयाँले बढेर ८४ हजार ९३२ रूपैयाँ पुग्छ। यो बढेको तलबमा मासिक रूपमा थप १० प्रतिशत प्रोत्साहन रकम दिने बजेटले उद्घोष गरेको छ। त्यसो हुँदा ८ हजार ४९३ रूपैयाँले बढेर ९३ हजार ४३२ रूपैयाँ पुग्छ।

यो रकममा ५ हजार थप महँगी भत्ता दिइएको छ। यसो हुँदा ९८ हजार २५ रूपैयाँ तलब भत्ता हुन्छ। यस बाहेक आधारभूत तुलनामा मुख्यसचिवको दुई ग्रेड थप पैसा आउँछ। यो भनेकोको दुई दिनको तलब हो। यसको अर्थ ५ हजार ६६२ थप तलब बढेर एक लाख ४ हजार ४८७ रूपैयाँ पुग्छ।

टेबलमा हेर्नुस् कसको कति तलब?

पद	साबिकको	नियमित बढेको तलब	नियमित बढेपछि थप १० प्रतिशत प्रोत्साहन	महंगी भत्ता	ग्रेड	ग्रेड रकम	जम्मा
मुख्य सचिव	७७ हजार २११	७ हजार ७२१	८ हजार ४९३	५ हजार	२	५ हजार ६६२	एक लाख ४ हजार ८७
सचिव	७२ हजार ८२	७ हजार २०८	७ हजार ९२९	५ हजार	२	५ हजार २८६	९७ हजार ५०५
सहसचिव	५६ हजार ७८६	५ हजा। ६७८	६ हजार २४६	५ हजार	७	१४ हजा। ५५७	८८ हजा। २८८
उपसचिव	४८ हजार ७३७	४ हजार ८७३	५ हजार ३६१	५ हजार	८	१४ हजार २९६	७८ हजार २६८
अधिकृत	४३ हजार ६८८	४ हजार ३६८	४ हजार ८०५	५ हजार	८	१२ हजार ८१५	७० हजार ६७८
नासु	३४ हजार ७३०	३ हजार ४७३	३ हजार ८०२	५ हजार	१०	१२ हजार ७३४	५९ हजार ७५८
खरिददार	३२ हजार ९०१	३ हजार २९०	३ हजार ६१९	५ हजार	१०	१२ हजार ६४	५६ हजार ८७४