अर्थमन्त्री डा. स्वर्णिम वाग्लेले नेपालले लिएको वैदेशिक ऋण धेरै नभएको स्पष्ट पार्दै यसको सदुपयोगमा जोड दिएका छन्।
आइतबार बजेटपछि पत्रकारहरूसँगको भेटघाटमा उनले यस्तो बताएका हुन्।
उनका अनुसार भूकम्पअघि नेपालको सार्वजनिक ऋण कुल गार्हस्थ्य उत्पादन जिडिपी को करिब २५–२६ प्रतिशत थियो।
तर पुनर्निर्माण र कोभिड–१९ महामारीका कारण यो अनुपात बढ्दै गएर सात वर्षमा झण्डै ४२–४३ प्रतिशत पुगेको छ, जुन अहिले पनि करिब त्यही स्तरमा रहेको छ।
हाल नेपालको कुल सार्वजनिक ऋण करिब २९ खर्ब ७५ अर्ब रूपैयाँ पुगेको छ।
यसमध्ये करिब ४१० अर्ब आन्तरिक ऋण र २४७ अर्ब बराबर बाहिरी ऋण रहेको उनले जानकारी दिए।
यो ऋण आगामी दिनमा बढेर करिब ३६ खर्बसम्म पुग्न सक्ने अनुमान पनि उनले गरेका छन्।
अर्थमन्त्री वाग्लेले अहिले लिइने ऋणको ठूलो हिस्सा पहिलेका दायित्व तिर्नमै खर्च भइरहेको उल्लेख गर्दै यस वर्ष मात्रै करिब ३१८ अर्ब रूपैयाँ ऋण तिर्नुपर्ने अवस्था रहेको बताए, जसमा ७२ अर्ब वैदेशिक ऋण समावेश छ।
उनले सरकारको ऋण–जिडिपी अनुपात ४३ प्रतिशत हाराहारीमै रहने र सरकारले 'खुद ऋण' को आधारमा थप ऋण व्यवस्थापन गर्ने नीति अपनाएको जानकारी दिए।
साथै, बैंकिङ प्रणालीमा रहेको तरलताको उपयोग गर्न सक्ने व्यवस्था गरिएको पनि उनले बताए।
उनले बजेटको आकार जिडिपीको तुलनामा अत्यधिक ठूलो नभएको भन्दै वैदेशिक ऋणको सही र उत्पादनशील उपयोग आवश्यक रहेको दोहोर्याए।
अन्त्यमा उनले भने, 'ऋण लिएर सदुपयोग त गर्नुपर्छ, बाख्राको खोर बनाएर भएन, भूकम्पको बेला अलिअलि भएको रहेछ।'
