सरकारले स्थलमार्गबाट सिमाना ओहोरदोहोर गर्दा यात्रुले आफ्नो साथमा ल्याउने निजी प्रयोगका वस्तुमा दिइने भन्सार छुटको सीमा बढाएको छ।
बजेटसँगै सरकारले अद्यावधिक गरेको भन्सारसम्बन्धी झिटीगुन्टाको व्यवस्थाबाट एक सय रूपैयाँको सीमा बढाएर पाँच सय रूपैयाँ पुर्याइएको हो।
बालेन नेतृत्वको सरकार आएसँगै सीमा क्षेत्रमा १०० रूपैयाँको यो प्रावधान कडाइका साथ कार्यान्वयन गर्न थालिएको थियो।
तर, भन्सार अधिकारीहरूले १०० रूपैयाँको सीमा अत्यन्तै न्यून रहेको कारण कार्यान्वयन गराउन समस्या परेको बताएका थिए। सीमावर्ती क्षेत्रका नागरिक र जनप्रतिनिधिहरूले असन्तुष्टि जनाएका थिए।
त्यसपछि अर्थमन्त्री स्वर्णिम वाग्लेले १०० रूपैयाँको सीमा अव्यावहारिक भएको स्वीकार गर्दै बढाउने प्रतिबद्धता जनाएका थिए।
त्यस्तै, झिटीगुन्टाको नयाँ व्यवस्थाले श्रम स्वीकृति लिएर वैदेशिक रोजगारमा गई लगातार कम्तीमा १२ महिना काम गरी फर्केका नेपाली नागरिकले अब 'पैँसठ्ठी (६५) इन्चसम्मको टेलिभिजन एक थान' पूर्ण भन्सार छुटमा ल्याउन पाउनेछन्।
यसअघि सामाजिक सुरक्षा कोषमा सूचीकृत नभएका श्रमिकले ३२ इन्चसम्मको मात्र ल्याउन पाउने कडा सर्त थियो, जसलाई अहिले हटाइएको छ।
अन्तर्राष्ट्रिय हवाई उडानबाट आउने यात्रुले भन्सार छुटमा ल्याउन पाउने व्यक्तिगत सामानको सूचीमा 'पावर बैंक एक वटा' थपिएको छ। अघिल्लो व्यवस्थामा यो समावेश थिएन।
कसले के–के पाउँछ?
स्थलमार्ग हुँदै ओहोरदोहोर गर्ने व्यक्ति: ५ सय रूपैयाँ मूल्यसम्मका निजी प्रयोगका वस्तु भन्सार प्रमुखले औचित्य हेरी महसुल नलिई छाड्न सक्ने सुविधा पाउँछन्।
भारतमा अध्ययन गर्ने नेपाली विद्यार्थीले आफ्नो साथमा लगेको वा ल्याएको ट्याब्लेट वा ल्यापटप वा कम्प्युटरमध्ये कुनै एक थान भन्सार छुटमा ल्याउन पाउँछन्।
वैदेशिक रोजगारबाट फर्किने नेपाली (६ महिना काम गरेका) ले आफ्नो नियमित प्रयोगको फोनबाहेक थप एक थान नयाँ सेलुलर मोबाइल फोन भन्सार नतिरी ल्याउन पाउँछन्।
वैदेशिक रोजगारबाट फर्किने नेपाली (१२ महिना काम गरेका) ले पैँसठ्ठी (६५) इन्चसम्मको टेलिभिजन एक थान भन्सार छुटमा ल्याउन पाउँछन्।
सबै अन्तर्राष्ट्रिय यात्रु (नेपाली र विदेशी): आफूले प्रयोग गरेका पुराना लुगाफाटा, १ थान ट्याब्लेट वा ल्यापटप, १ घडी, १ क्यामेरा, १ मोबाइल फोन, सात किलोग्रामसम्म खाद्य परिकार, १ लिटरसम्मको मदिरा र १ वटा पावर बैंक पूर्ण छुटमा ल्याउन पाउँछन्।
विदेशी यात्रु (फर्कंदा): नेपालमा विदेशी मुद्रा सटही गरेको प्रमाणका आधारमा नेपाली बजारमा खरिद गरेका ५ लाख रूपैयाँसम्मका सामान साथमा लैजान पाउँछन् (भ्याट बिल भएमा मूल्यको बन्देज लाग्दैन)।
यसबाहेक, विदेशबाट फर्कने यात्रुले पुरुषको हकमा २५ ग्राम र महिलाको हकमा ५० ग्रामसम्मको सुन भन्सार नतिरी ल्याउने व्यवस्था निरन्तरता दिइएको छ।
हुलाक वा कार्गोबाट पठाउने सामानको छुट: विदेशमा ६ महिनादेखि १ वर्षसम्म बसेकाले १५ हजार रूपैयाँसम्म र १ वर्षभन्दा बढी बसेकाले २५ हजार रूपैयाँसम्मको सामानमा भन्सार छुट पाउने व्यवस्था पनि निरन्तरता दिइएको छ, अर्थात् संशोधन छैन।
५ हजार अमेरिकी डलर वा सो बराबरको विदेशी मुद्रा साथमा ल्याएमा भन्सार विन्दुमा अनिवार्य घोषणा गर्नुपर्ने नियम कायमै राखिएको छ।
