नेपाल राष्ट्र बैंकका कार्यकारी निर्देशक सत्येन्द्र तिमल्सिनाले वित्तीय प्रविधि क्षेत्रको विकासका लागि नियामक निकायको भूमिका केवल नियन्त्रणमा सीमित नभई प्रवर्द्धन र सहजीकरणतर्फ उन्मुख हुनुपर्ने बताएका छन्।
सेतोपाटीले आयोजना गरेको नेपाल फिनटेक कनक्लेभ २०२६ मा बोल्दै उनले वित्तीय नवप्रवर्तनलाई सुरक्षित रूपमा अघि बढाउन नियामकले सक्षम बनाउने वातावरण (इनेबलिङ इन्भाइरोन्मेन्ट) निर्माण गर्नुपर्नेमा जोड दिए।
उनका अनुसार नयाँ फिनटेक समाधानहरूलाई सिधैँ बजारमा ल्याउनुभन्दा पहिले सीमित दायरामा परीक्षण गर्ने 'नियामकीय स्यान्डबक्स' अवधारणा उपयोगी उपकरण हो। यसले जोखिम न्यूनीकरण गर्दै नयाँ प्रयोग र नवप्रवर्तनलाई प्रोत्साहन गर्ने उनले बताए।
तिमल्सिनाले नेपालमा क्रेडिट स्कोरिङ प्रणाली अझै प्रारम्भिक चरणमा रहेको उल्लेख गर्दै यसको विकासका लागि आवश्यक डेटा र त्यसको प्रयोगबारे स्पष्ट संरचना आवश्यक रहेको बताए।
उनका अनुसार एउटा संस्थाले संकलन गरेको डेटा अर्को संस्थाले प्रयोग गर्न पाउने वा नपाउने विषयमा कानुनी स्पष्टता अभाव रहँदा नयाँ वित्तीय समाधान विकासमा चुनौती देखिएको छ।
उनले वित्तीय क्षेत्रमा नवप्रवर्तनको मुख्य उद्देश्य लागत घटाउने, जोखिम कम गर्ने र सेवाग्राहीसम्म सरल र प्रभावकारी सेवा पुर्याउने भएको बताए।
सही प्रविधि र प्रणालीको संयोजन बिना लक्षित वर्गसम्म सेवा पुर्याउन कठिन हुने उल्लेख गर्दै उनले नियामक निकायहरू पनि प्रविधिमैत्री हुनुपर्ने आवश्यकता औंल्याए।
उनले प्रविधि र नियमनबीच सन्तुलन कायम भए मात्र डिजिटल वित्तीय क्षेत्रले दिगो रूपमा विकास हासिल गर्न सक्ने निष्कर्ष प्रस्तुत गरे।
