सरकारको प्राइज पोर्टलमा पछिल्लो १६ दिनमा नगद कारोबारका बिल अपलोड गर्ने उपभोक्ता उल्लेख्य बढेका छन्।
आन्तरिक राजस्व विभागका अनुसार साउन १६ देखि ३१ गतेसम्म ३ लाख ५७ हजार १४९ वटा नगद कारोबारका बिल दर्ता भएका छन्।
साउनको पहिलो १५ दिनमा जम्मा ७ हजार ७७ वटा मात्रै बिल दर्ता भएका थिए।
यस्तै, क्युआर कारोबारबाट स्वतः सहभागी हुने उपभोक्ताको संख्या पनि बढेको छ।
यो संख्या २ करोड ५६ लाख ८ हजार ९४ बाट बढेर ३ करोड २० लाख ८६ हजार ३८० पुगेको छ।
विभागका अनुसार पछिल्लो १७ दिनमा कुल कारोबार संख्या ३ करोड २४ लाख ४३ हजार २२९ पुगेको छ।
यिनै कारोबारबाट आज १७ जना विजेता छनोट गरिने विभागले जनाएको छ।
साउन १६ देखि ३१ गतेसम्मका १७ दिनका एक-एक जनाले १ लाख ३३ हजार ३३४ रूपैयाँका दरले पुरस्कार पाउनेछन्।
कर कटाएपछि उनीहरूले १ लाख रूपैयाँ पाउनेछन्।
यस्तै, एक जनाले बम्पर उपहार पाउनेछन्। उनले १० लाख रूपैयाँ जित्नेछन्। यसमा २५ प्रतिशत कर लाग्नेछ।
आज गत साउनको पहिलो पाक्षिकका विजेतालाई नगद पुरस्कार पनि प्रदान गरिनेछ।
