सामाजिक सुरक्षा कोषले आफ्ना योगदानकर्तालाई स्वास्थ्य सेवा प्राप्त गर्ने क्रममा कुनै समस्या परे तत्काल उजुरी गर्न आग्रह गरेको छ।
कोषले सोमबार सूचना जारी गर्दै औषधि उपचार, स्वास्थ्य तथा मातृत्व सुरक्षा योजना र दुर्घटना तथा अशक्तता सुरक्षा योजना अन्तर्गत स्वास्थ्य सेवा लिन जाँदा कोषसँग सम्झौता गरेका अस्पतालले सेवा दिन आनाकानी गरे वा विभेदपूर्ण व्यवहार गरेमा तत्काल जानकारी गराउन अनुरोध गरेको हो।
सेवा लिन योगदानकर्ता कोषसँग सम्झौता भएका अस्पतालमै जानुपर्नेछ।
साथै अस्पताल पुग्नुअघि योगदानकर्ता सूचीमा नाम रहेको र केवाइसी विवरण अद्यावधिक भएको सुनिश्चित गर्नुपर्ने कोषले जनाएको छ।
स्वास्थ्य सेवा लिँदा सामाजिक सुरक्षा कोषबाट जारी गरिएको परिचयपत्र (भौतिक वा भर्चुअल कार्ड) अनिवार्य रूपमा देखाउनुपर्नेछ।
कोषले सम्झौता गरेका अस्पतालहरूले कुनै पनि प्रकारका सेवामा विभेद गर्न नपाउने स्पष्ट पारेको छ।
चिकित्सकले लेखिदिएको औषधि उपलब्ध नगराउने, शल्यक्रिया नगर्ने, भर्ना नलिने, ओपिडी समयभन्दा बाहिर आएको भन्दै बिरामीलाई फर्काउने वा अन्य कुनै असमान व्यवहार गरेमा त्यसबारे उजुरी गर्न कोषले आग्रह गरेको हो।
यस्ता समस्या आएमा मोबाइल नम्बर ९८५१३४५८१४, कल सेन्टर १११६, इमेल claim@ssf.gov.np, व्हाट्सएप ९८५१३४५८१४ वा फोन नम्बर ०१–५३६०३१५ मा सम्पर्क गरेर गुनासो दर्ता गराउन सक्ने कोषले जनाएको छ।
