सडक विभागले रसुवा बाढीका कारण सडक र पुलमा ठूलो क्षति भएको प्रारम्भिक अनुमान गरेको छ।
सडक तथा मोटरेबल पुलमा मात्रै २० अर्ब रूपैयाँ बराबरको क्षति भएको सडक विभागले जनाएको छ।
सडक विभागका उपमहानिर्देशक एवं प्रवक्ता शुभराज न्यौपानेका अनुसार बाढीका कारण करिब ४० किलोमिटर सडक पूर्ण रूपमा क्षतिग्रस्त भएको छ।
ठाउँ-ठाउँमा सडकहरू पुरिएको अवस्था छ। तर सबै ठाउँमा पुगेर हेर्न नसकिएको उनले बताए।
'अहिले म बेत्रावतीमै छु। यहाँभन्दा माथि जान सकिने अवस्था छैन। अहिलेसम्म पाएको जानकारी अनुसार योभन्दा माथिको सडक पूर्ण क्षतिग्रस्त छ,' उनले सेतोपाटीसँग भने।
पूर्वाधार विकास मन्त्रालयले पनि बेत्रावतीदेखि मैलुङ हुँदै स्याफ्रुबेँसी–रसुवागढी जोड्ने सडक पूर्ण रूपमा क्षतिग्रस्त भएको जनाएको छ।
गल्छीदेखि त्रिशूलीसम्मको करिब १० किलोमिटर सडक समेत बन्द अवस्थामा छ।
यसैगरी, बाढीका कारण पृथ्वीराजमार्ग अन्तर्गत करिब १३ किलोमिटर सडक खण्डमा समेत असर पुगेको थियो। १३ किमि लेदोले भरिएको उनले बताए।
'पछिल्लो समय बाढीकै कारण कृष्णभिरमा पनि सडक कटान भएको छ। बाढीले ठूलो क्षति पुर्याएको छ,' उनले भने।
त्यस्तै, बाढीले ४१ वटा मोटरेबल पुल पूर्ण रूपमा क्षति गरेको छ।
क्षति भएका कतिपय ठाउँमा बेलिब्रिज राख्ने योजना अघि सारिएको छ। तर कतिपय स्थानमा तत्काल बेलिब्रिज राख्न समेत सम्भव नहुने गरी क्षति भएको जनाइएको छ।
आवश्यक ठाउँमा बेलिब्रिज निर्माणका लागि छिमेकी मुलुक भारत र चीनसँग सहयोग मागेको जनाएको छ।
सडक र पुल पुनःनिर्माणका लागि मात्रै ५० अर्ब रूपैयाँभन्दा धेरै लागत लाग्ने अनुमान विभागले गरेको प्रवक्ता न्यौपानेले बताए।
'अहिले धेरै खर्चिलो भइसकेको छ। एक किलोमिटर सडकको लागत २० करोड रूपैयाँभन्दा बढी पर्न जान्छ,' उनले भने।
रसुवा, नुवाकोट र धादिङबेँशीमा आवागमन नै ठप्प हुने गरी सडक सञ्जालमा क्षति पुगेको छ। कतिपय ठाउँमा मानिसहरूको आवागमन तथा दैनिक उपभोग्य वस्तु आपूर्ति ठप्प छ।
प्रवक्ता न्यौपानेले वैकल्पिक सडक सञ्चालनका लागि काम भइरहेको बताए।
बाढी, पहिरोका कारण नेपालले वर्षेनी ठूलो क्षति व्यहोर्दै आएको छ।
गत वर्ष(२०८२ असोज १८, १९ तथा २०) गते र त्यस अगाडिको बाढी–पहिरोका कारण क्षति पुगेका सडकका संरचनाका पुनर्निर्माणका लागि करिब १२ अर्ब ३८ करोड रूपैयाँ लाग्ने अनुमान सडक विभागले गरेको थियो।
गएको वर्ष पनि मनसुनजन्य विपद्बाट विपी लगायत मुख्य राजमार्ग तथा विभिन्न सडकमा ठूलो क्षति पुगेको थियो।
बाढी पहिरोले कोशी, मध्यपहाडी, हुलाकी, अरनिको, कान्ति, नारायणघाट–मुग्लिङलगायतका राजमार्गमा समेत ठूलो क्षति पुर्याएको थियो।
यी राजमार्गको पुनर्निर्माणका लागि मात्रै तीन अर्ब ७७ करोड रूपैयाँ लाग्ने अनुमान गरिएको थियो।
उक्त वर्ष सबैभन्दा बढी क्षति मेची राजमार्गमा पुगेको थियो।
मेची राजमार्गको पुनर्निर्माणका लागि डेढ अर्ब रूपैयाँ लाग्ने अनुमान गरिएको थियो।
त्यस्तै, गएको वर्ष १७ वटा मोटरेबल पुलमा क्षति पुगेको र ती पुल पुनर्निर्माणका लागि चार अर्ब ५२ करोड लागत लाग्ने अनुमान गरिएको थियो।
-1787736824.jpeg)
