बाँकेको नेपालगञ्जस्थित राँझा विमानस्थलको नयाँ टर्मिनल भवन प्रयोगमा आएको छ।
वैशाख १५ गतेदेखि विमानस्थलको नवनिर्मित अत्याधुनिक टर्मिनल भवन प्रयोगमा आएको हो। विमानस्थलका प्रमुख सन्तोष पोखरेलका अनुसार सुरुमा टर्मिनल भवनको अराइभल तर्फ प्रयोगमा ल्याइएको छ।
नयाँ टर्मिनल भवनको डिपार्चरमा थोरै प्राविधिक समस्या देखिएको हुँदा प्राविधिकहरुले त्यसको व्यवस्थापन गरिरहेका छन्।
‘हाम्रो टेक्निकल टिमले काम गरिरहेको छ,’ प्रमुख पोखरेलले भने ‘ एक दुई दिनमै त्यो समस्या पनि समाधान भएर नयाँ भवन पूर्ण रुपमा प्रयोगमा आउने छ।’
उनका अनुसार यात्रुको लगेजको तौल नाप जोख गर्ने मेसिनमा थोरै समस्या देखिएको हुँदा काम भइ रहेको छ।
अर्कातर्फ नाप तौल तथा गुणस्तर विभागले यात्रुको ब्यागेजको तौल लिने हुँदा त्यसमा पनि काम भइ रहेको छ। आइटीका मानिसहरुले गर्न बाँकी थोरै केही काम अन्तिम चरणमा पुर्याएको तथा केही थोरै स्थानमा बिजुली बत्तीसम्बन्धि काम पनि भइरहेको प्रमुख पोखरेलले बताए।
नेपालगंजस्थित राँझा विमानस्थलको यो नयाँ टर्मिनल भवन अत्यधुनिक, अपाङ्गतामैत्री सुविधा भएको, ह्विलचियर प्रयोगकर्ताका लागि पनि सुविधा रहेको विमानस्थल प्रमुख पोखरेलले जानकारी दिए।
‘नयाँ टर्मिनल भवन पहिलेको भन्दा आधुनिक तथा ठूलो र खुला छ,’ उनले भने ‘ यो प्रयोगमा आएपछि यात्रुलाई मात्रै सजिलो भएको छैन कर्मचारीलाई पनि काम गर्न सहज भएको छ।’
नयाँ टर्मिनल भवनको प्रयोग सूरु भएकै दिन वैशाख १५ गतेदेखि विमानस्थलले यात्रुका लागि भनेर एउटा बस निःशुल्क रूपमा सञ्चालनमा ल्याएको छ। बसले विमानका यात्रुलाई राँझा चोकसम्म नेपालगन्ज वा कोहलपुर जाने मुख्य सडकसम्म छोड्न जानेछ भने त्यहाँ बसेका हवाई यात्रुलाई बोकेर विमानस्थल आउने गर्छ।
हाललाई एउटा मात्रै बस हवाई यात्रुलाई लक्ष्य गरेर निःशुल्क रूपमा सञ्चालनमा ल्याइएको र त्यो प्रयाप्त रहे पनि भविष्यमा यात्रुको चापलाई मध्यनजर गर्दै अरु बस पनि थप्न सकिने पोखरेलले बताए। आफ्नै सवारी साधन नभएकाले मात्रै निःशुल्क बसको सेवा लिने गरेका छन्।
नयाँ टर्मिनल भवन प्रयोगमा आए पनि तत्काल पुरानो टर्मिनल भवन भत्काइने छैन।
‘कार्यालयको अधिकांश काम पुरानै टर्मिनल भवनबाट हुँदै आएको छ,’ उनले भने ‘ तत्कालै पुरानो टर्मिनल भवन भत्काउने योजना छैन किनभने कार्यालयको काम पुरानै भवन बाट हुँदै आएको छ,’ पोखरेलले भने।
नेपालगञ्जस्थित राँझा विमानस्थलको नयाँ टर्मिनल भवन तोकिएको समय अगावै गत कार्तिकमा निर्माण कार्य पूरा भएको थियो।
भ्याट बाहेक कुल दुई अर्ब ७४ करोड २० लाख १८ हजार ९९३ रुपैयाँ लागतमा टर्मिनल भवन निर्माण भएको हो। यो टर्मिनल भवन निर्माणको जिम्मा काठमाडौंको ‘शर्मा एन्ड कम्पनी’ ले पाएको थियो।
२०७९ पुसबाट टर्मिनल भवन निर्माणको काम कम्पनीले सुरु गरेको थियो।
तीन वर्ष अर्थात २०८२ पुसमा काम सक्ने गरी निर्माण कम्पनीले काम सकारेको थियो। निर्माण कम्पनीले दुई महिना पहिलै निर्माण कार्य पूरा गरेको हो। नयाँ टर्मिनल भवन नेपाल नागरिक उड्डयन प्राधिकरणलाई गत चैतमा हस्तान्तरण गरिएको निर्माण कम्पनीका कन्ट्र्याक्टर विनोद सुवेदीले जाननकारी दिए।
यो नयाँ टर्मिनल बिल्डिङ सेमी बेसमेन्टसहित तीन तलाको छ। जसको बेसमेन्ट व्यावसायिक प्रयोजनका लागि निर्माण गरिएको छ। जहाँ कुल २४ वटा पसल रहनेछन्।
सुवेदीका अनुसार नव निर्मितन टर्मिनल बिल्डिङले पाँच हजार ७५ स्क्वायर मिटरको क्षेत्रफल ओगटेको छ। त्यसभित्र यात्रु चेकिङ काउन्टर १४ वटा, भिआइपी रूम तीन वटा, चिल्ड्रेन प्लेइङ एरिया एउटा, भन्सार र क्वारेन्टाइन चेकजाँचका लागि अलग / अलग कोठाहरू निर्माण गरिएका छन्।
नेपालगञ्जको नयाँ टर्मिनल भवन आवश्यक पर्दा अन्तर्राष्ट्रिय उडानका लागि पनि प्रयोग गर्न मिल्ने गरी निर्माण गरिएको निर्माण कम्पनीका सुवेदीले बताए।
तीन वर्ष पहिले यो विमानस्थलको धावन मार्ग विस्तार गरी १७ सय मिटर पुर्याइएको थियो। यहाँ बाट सोझै भारतको डिल्लीसम्मको उडानको लागि प्रयासहरु भइ रहेका छन्।
भविष्यमा हुने सक्ने अन्तर्राष्ट्रिय उडानको सम्भावनालाई मध्यनजर गर्दै घरेलु र अन्तर्राष्ट्रिय उडानका लागि अलग / अलग यात्रु प्रस्थान र आवागमन ढोकाहरू तयार गरिएको छ।
पिकआवरमा नवनिर्मित टर्मिनल भवनको यात्रु क्षमता प्रतिघन्टा ६२८ रहेको छ।
नयाँ टर्मिनल भवनभित्र बगैंचाका साथै ५ देखि १४ मिटर फराकिलो बाटो निर्माण गरिएको छ। टर्मिनल भवन परिसरमा ढल निकास तथा बढी भएको पानी निकासको लागि उचित नाला बनाइएको पनि गरिएको सुवेदीले बताए।
नयाँ टर्मिनल भवन क्षेत्रमा ह्यांगर अर्थात जहाज पार्किङ गर्ने ठाउँ पनि निर्माण गरिएको छ। जसमा एटिआर–७२ जहाज ३ वटा र ट्विअटर जहाज ५ वटा एकै पटकमा पार्किङ गर्न मिल्ने सुविधा छ। नयाँ टर्मिनल भवनको परिसरमा सवारी साधन पार्किङको छुट्टै ठाउँ पनि निर्माण गरिएको छ।
निर्माण कम्पनीका सुवेदीका अनुसार मोटरसाइकल १५५, इभी गाडी चार्जिङ स्टेसनसहित १० गाडी, फोर ह्विल सानो गाडी १०२, बसहरू पाँच वटा, अटो रिक्सा ३० वटा पार्किङ गर्ने पार्किङस्थल निर्माण गरिएको छ।
राँझा विमानस्थलमा ६५ वर्षअघि सन १९६१ मार्च १५ मा पहिलो उडान भएको थियो।
नेपाल नागरिक उड्डयन प्राधिकरणका अनुसार राँझा विमानस्थलमा सन २०१५ मा यात्रु संख्या एक लाख ७६ हजार रहेको थियो। सन २०१९ मा चार लाख ४३ हजार पुग्दा उडान संख्या पनि नौ हजारबाट बढेर १५ हजार पुगेको थियो।
त्यस्तै, सन २०२२ मा दैनिक औसत १५५२ यात्रु आवतजावत गरेका थिए।
जस अनुसार सन २०४० सम्ममा राँझा विमानस्थलबाट यात्रा गर्ने यात्रुको संख्या वार्षिक २० लाख पुग्ने प्राधिकरणको प्रक्षेपण छ। सोही तथ्यलाई आधार मान्दै सन २०४० सम्मको आवश्यकता पूरा गर्ने गरी नयाँ टर्मिनल भवनको डिजाइन र निर्माण गरिएको हो।
