इस्तानबुलबाट काठमाडौं आएको जहाजमा आगो लागेपछि आपतकालीन उद्धार गरिएको छ।
टर्किस एयरलाइन्सको टिके-७२६ कल साइन भएको जहाजको चक्कामा आगो देखिएको हो।
त्रिभुवन विमानस्थलमा अवतरण हुनेबित्तिकै जहाजमा आगो देखिएको थियो।
दमकलको सहायताले आगो नियन्त्रणमा लिएको त्रिभुवन विमानस्थलका एक अधिकारीले बताए। उनका अनुसार यात्रुहरूलाई आपतकालीन ढोका खोलेर उद्धार गरिएको छ।
जहाजमा ४ बालकसहित २७७ यात्रु थिए। उनीहरू सबै सुरक्षित रहेको ती अधिकारीको भनाइ छ।
जहाज अहिले धावनमार्गमै छ। जसका कारण धावनमार्ग प्रभावित भएको छ। अहिले कुनै पनि अन्तर्राष्ट्रिय उडान भएको छैन।
