संस्कृति, पर्यटन तथा नागरिक उड्डयन मन्त्री खड्गराज पौडेल, राष्ट्रिय स्वतन्त्र पार्टी (रास्वपा) का महामन्त्री विपिन आचार्य र नेपाल नागरिक उड्डयन प्राधिकरण (क्यान) का महानिर्देशक मुकेश डंगोल सहितको टोलीले दाङको टरिगाउँ विमानस्थलको स्थलगत निरीक्षण गरेको छ।
तुलसीपुर उपमहानगरपालिका–१२ स्थित विमानस्थलको निरीक्षणपछि मन्त्री पौडेलले विमानस्थलको धावनमार्ग करिब ६ सय मिटरसम्म विस्तार गर्न सकिने प्रारम्भिक सम्भावना देखिएको बताए।
उनले हालको धावनमार्गलाई ‘टिल्ट’ गर्नुपर्ने भनिए पनि स्थलगत निरीक्षणका क्रममा सिधै विस्तार गर्न सकिने सम्भावना देखिएको बताए।
‘यो विमानस्थल अब विस्तार हुन्छ,’ मन्त्री पौडेलले भने, ‘महामन्त्रीज्यूको जिल्लाको विमानस्थल नबनी हुन्छ?’
रास्वपा महामन्त्री आचार्यले टरिगाउँ विमानस्थल विस्तारको पहल कुनै व्यक्तिविशेषका कारण नभई यसबाट दाङसहित आसपासका जिल्लाका करिब १७–१८ लाख जनसंख्यालाई लाभ पुग्ने भएकाले गरिएको बताए।
उनले विमानस्थल विस्तारको विषयमा प्राविधिक अध्ययनलाई आधार बनाएर निर्णय गरिने स्पष्ट पारे।
घोराहीको नारायणपुर र टरिगाउँ विमानस्थलबीचको विवादमा अल्झिनुभन्दा अहिले टरिगाउँ विमानस्थल विस्तारमा केन्द्रित हुनुपर्ने उनको भनाइ थियो।
आचार्यले सीमित स्रोतसाधन भएको अवस्थामा स्रोतको अधिकतम उपयोग गर्नुपर्ने भन्दै विमानस्थल विस्तारको विषयलाई नेताहरूको प्रतिष्ठासँग जोड्न नहुने बताए।
उनका अनुसार टरिगाउँ विमानस्थल विस्तारका पक्षमा दाङसहित प्यूठान, रोल्पा, बर्दिया र सल्यानका सांसदहरू पनि सकारात्मक छन्।
मन्त्री पौडेलले चालु आर्थिक वर्षमा टरिगाउँ विमानस्थलका लागि २५ करोड रुपैयाँ बजेट विनियोजन गरिएको जानकारी दिँदै धावनमार्ग विस्तारको काम पूरा नभएसम्म आगामी वर्षमा पनि बजेट निरन्तर आउने बताए।
क्यानका महानिर्देशक मुकेश डंगोलले विमानस्थल सुरक्षित रूपमा सञ्चालन गर्नु क्यानको मुख्य प्राथमिकता भएको बताए। उनले विगतका अध्ययनमा हालकै धावनमार्गको दिशामा कम लागतमा विस्तार गर्न सकिने विकल्पबारे छलफल भएको जानकारी दिए।
उनका अनुसार विगतमा टरिगाउँ विमानस्थलका विषयमा पाँचवटा विकल्पमा अध्ययन भएको थियो। अहिले पाँचौं विकल्पअन्तर्गत धावनमार्गलाई सिधै विस्तार गरी ‘थ्री सी’ श्रेणी अर्थात् एटीआर–७२ सम्मका जहाज सञ्चालन गर्न सक्ने बनाउने सम्भावनाबारे थप प्राविधिक अध्ययन गरिनेछ।
डंगोलले विस्तृत प्राविधिक अध्ययनपछि मात्रै धावनमार्ग विस्तारको सम्भावना र लागत यकिन हुने बताए।
निरीक्षणमा दाङ क्षेत्र नम्बर ३ का प्रतिनिधिसभा सदस्य कमल सुवेदी, दाङ क्षेत्र नम्बर १ का प्रतिनिधिसभा सदस्य देवराज पाठक, सांसद सुरेन्द्र चौधरी, प्यूठानका सांसद सुशान्त वैदिकलगायत जनप्रतिनिधि तथा प्राविधिक टोली सहभागी थियो।
.JPG)
.JPG)
