राष्ट्रिय जनमोर्चाका अध्यक्ष चित्रबहादुर केसीले राष्ट्रिय परिचयपत्र रूजु गर्न विदेशी कम्पनीलाई ठेक्का दिनु आपत्तिजनक रहेको बताएका छन्।
आइतबारको प्रतिनिधि सभा बैठकमा बोल्दैन अध्यक्ष केसीले राष्ट्रिय परिचय पत्र जस्तो संवेदनशील विवरण रूजु गर्न हतार हतार विदेशी कम्पनीलाई ठेक्का दिने निर्णय आपत्तिजनक रहेको बताएका हुन्।
ठेक्का प्रक्रियामा विधि मिचिएको पनि उनले बताए ।
‘देशको विधिविधान र कार्यविधिले स्थापित गरेको मापदण्ड भन्दा घटाएर सात दिनको बोलपत्र गर्ने काम कानुनी रुपमा अक्षम्य छ,’ केसीले भने।
उनले देशको विधिविधानमा कसैको आर्थिक स्वार्थ हावी हुने स्थिती किमार्थ स्वीकार्य नहुने पनि बताए। यस्ता प्रवृत्तिलाई कानुनी दायरामा ल्याउन वान्छनीय हुने केसीको भनाइ छ।
पुराना पार्टीहरूले कमजोरी गरे भनेर उदाएका नयाँ पार्टीहरूले पनि जनतालाई झुक्याएको केसीको दाबी छ।
‘नयाँ आएका पार्टीहरूले नयाँ चिज ल्याउने भए भनेर नेपाली जनताले हेर्दाखेरी खास्टाले ढाकेको बिरालो छ्टिटै म्याउँ गर्यो। यस्ता प्रवृत्तिलाई त्यसै छोड्न हुन्न,’ केसीले भने।
राष्ट्रिय स्वतन्त्र पार्टीका सभापति गृहमन्त्री हुँदा राष्ट्रिय परिचय पत्रमा आवद्ध नागरकका वैयक्तिक र जैविक विवरण रूजु गर्ने जिम्मा फास्ट ट्र्याकबाट विदेशी कम्पनीलाई दिएको विषय सार्वजनिक भएको थियो।
