राष्ट्रिय प्रजातन्त्र पार्टीका अध्यक्ष राजेन्द्र लिङदेनले मिटरब्याज पीडित र तराईमा आन्दोलनरत हरूवाचरूवाको माग तत्काल सम्बोधन नगरे सरकारविरूद्ध सडक संघर्षमा जाने चेतावनी दिएका छन्।
मंगलबार प्रतिनिधि सभामा आकस्मिक समय लिएर बोल्दै उनले मिटरब्याज पीडितहरूको मागलाई सम्बोधन गर्नुको साटो सरकारले उनीहरूमाथि हिजो (सोमबार) निर्मम ढंगले आक्रमण गरेको उल्लेख गर्दै निन्दा र भत्सर्नासमेत गरे।
गरिब र निमुखा ती मानिसहरूमाथि किन आक्रमण गर्नु परेको भनी सरकारलाई अध्यक्ष लिङदेनले प्रश्नसमेत गरे।
सर्वहारावर्गको अधिनायकत्व स्थापना गर्ने सपना बाँडेर हिँडेको पार्टी नेतृत्वको सरकारले पनि उनीहरूमाथि आक्रमण गर्ने काम गर्नु आपत्तिजनक रहेको बताए।
‘देशमा कसैले पनि अन्यायमा पर्नु पर्दैन। कसैले पनि हेपिनु पर्दैन। राज्य अभिभावक छ भनेर राज्य अभिभावकको रूपमा उभिनुपर्नेमा न्यायको माग गर्दै आएका मिटरब्याज पीडितहरूलाई सरकारले हिजो जुन निर्मम ढंगले आक्रमण गरेको छ। त्यसको म निन्दा र भत्सर्ना गर्न चाहन्छु,’ उनले भने,‘यतिबेला ती निमुखा मानिसहरूमाथि आक्रमण भएको छ। जुन बेला यस्तो सरकार छ। जसले समाजमा गरिबहरूको अथवा सर्वहारा वर्गको अधिनायकत्व स्थापना हुनेछ, स्थापना गर्नेछौं भनेर सपना बाँडेको थियो। त्यो सपना बाँडने पार्टी र उसको नेतृत्वमा अहिले सरकार छ। तर यति नै यो गरिब र निमुखामाथि राज्यले किन बर्बर आक्रमण किन भइरहेको छ?’
उनीहरूको मागलाई सरकारले समयमै सम्बोधन नगरे उनीहरूको साथमा सडक संघर्षमा जाने घोषणा समेत गरे।
अध्यक्ष लिङदनले पीडित पक्षको अभिभावकीय भूमिकामा सरकार नरहेको भन्दै असन्तुष्टि समेत व्यक्त गरे।