नेपाली कांग्रेसका नेता शेखर कोइरालाले पूर्व अयोग्य लडाकुको नाममा पैसा बाँड्ने सरकारको तयारीको विरोध जनाएका छन्।
आज बिहान सामाजिक सञ्जालमार्फत कोइरालाले मुलुकको ढुकुटीमा पैसा नभएर सरकारी कर्मचारीलाई तलब र पूर्व शिक्षकहरूको पेन्सन दिन समेत नसकेको अवस्थामा सरकारले पूर्व लडाकुको नामम पैसा बाँड्ने कार्य स्वीकार्य नहुने बताएका हुन्।
उनले विगतमा क्यान्टोनमेन्टमा भएका लडाकुका लागि लिएको पैसाको हिसाबकिताब नबुझाएको र द्वन्द्वकालीन समस्या समाधानमा आनाकानी गर्दै लम्ब्याएको आरोप पनि लगाएका छन्।
‘बिगतमा क्यान्टोन्मेन्टमा भएका लडाकुका लागि लिएको पैसाको हिसाव किताव वुझाउन नसक्नु, द्वन्दकालीन समस्या समाधानमा आनाकानी गर्दै लम्ब्याउनु तथा ढुकुटीमा पैसा नभएका कारण सरकारी कर्मचारीहरुको तलब र पूर्वशिक्षकहरुको पेन्सन दिन समेत नसक्ने अवस्थाको सरकारले पूर्व अयोग्य लडाकुको नाममा पैसा बाँढ्ने कार्य स्वीकार्य हुनै सक्दैन,’ उनले लेखेका छन्।
कोइरालाले माअोवादी नेतृत्वको सरकारको यस्ता कामको विरोध गर्दै सचेत रहनुपर्ने बताएका छन्। उनले पूर्व लडाकुलाई पैसाभन्दा रोजगारी दिन सुझाएका छन्।
सरकारले माओवादी पूर्वलडाकुलाई प्रतिव्यक्ती दुई लाख दिने प्रक्रिया अगाडि बढाइसकेको छ।
यो पनिः उनीहरू लडाकू नै थिएनन्
