नेकपा एमालेका पोलिटब्युरो सदस्य एवं सांसद सूर्य थापाले नेपाली नागरिकलाई भुटानी शरणार्थी बनाउने जोकोहीलाई पनि कारबाही गर्नुपर्ने बताएका छन्।
बिहीबार सामाजिक सञ्जालमार्फत थापाले नेपाली नागरिकलाई भुटानी शरणार्थी बनाउने धन्दावाल र नक्कली शरणार्थी बन्न तयार भएर लाखौं रकम बुझाउने गैरकानुनी काममा संलग्न व्यक्तिहरुलाई पनि जाहेरी सँगसँगै पक्राउ, अनुसन्धान र कारबाही गर्नुपर्ने बताएका छन्।
‘नेपाली भइकन नक्कली भुटानी शरणार्थी बन्न तयार भई रकम संकलन गर्ने र बुझाउनेहरू पीडित कदापि होइनन्। तिनको रकम जफत गर्नुपर्छ,’ सामाजिक सञ्जालमा उनले लेखेका छन्।
उनले गैरकानुनी काम गर्ने, गराउने र संलग्न हुने सबै अपराधी रहेको बताएका छन्। ‘यसमा निर्दोष कसैलाई फसाउनु हुँदैन र कोही पनि अपराधीले उन्मुक्ति पाउनुहुँदैन,’ उनले लेखेका छन्।
नक्कली भुटानी नागरिक बनाएर अमेरिका लैजाने प्रकरणमा एमाले सचिव टोपबहादुर रायमाझीविरूद्ध पक्राउ पुर्जी जारी भइसकेको छ। उनी कहाँ छन् भन्नेबारे अहिलेसम्म प्रहरीले यकिन जानकारी दिएको छैन।
रायमाझीका छोरा सन्दीप रायमाझीलाई पक्राउ गरिसकिएको छ।
-1715411980.jpg)
