मंसिर ४ गतेको प्रतिनिधि सभा निर्वाचनमा अछाम-१ बाट उम्मेदवार बन्न भीम रावललाई एमालेले टिकट दिएन।
२०७८ मंसिरमा भएको एमालेको दसौं महाधिवेशनमा केपी शर्मा ओलीको निर्विरोध अध्यक्ष बन्ने चाहनामा बाधक बनेपछि रावलले त्यसैको प्रतिशोधस्वरूप पार्टीबाट पाखा लगाउन खोजिएको बुझे।
त्यसपछि उनी पार्टी काममा फर्किएनन्।
गत चैत १४ गते अछाम पुगेका उपाध्यक्ष विष्णु पौडेलविरूद्ध नाराबाजी भयो। ‘मिसन ग्रासरूट’ अभियानअन्तर्गत साँफेबगरमा आयोजना गरेको कार्यक्रममा भीम रावलको आलोचना गरेपछि उनीविरूद्ध ढुंगामुढा भएको थियो।
त्यसयता एमाले र रावलबीच द्वन्द्व झन् चुलिएको छ। परिस्थिति यस्तोसम्म भयो भाम रावलसँग कुरा गर्न एमालेले वार्ता टोली नै गठन गर्नुपर्यो।
चैत १८ गते बनेको उपाध्यक्ष विष्णु पौडेल नेतृत्वको वार्ता टोलीमा सचिव लेखराज भट्ट र पोलिटब्युरो सदस्य कर्ण थापा सदस्य छन्।
वार्ता टोलीले वैशाख ३ गते रावलसँग एक चरणको वार्ता गरेको सदस्य थापाले जानकारी दिए।
‘हामीले एक चरणको वार्ता गरेका छौं,’ थापाले सेतोपाटीसँग भने, ‘उहाँसँग खुला रूपमा कुराकानी भएको छ। उहाँले धेरै ठूलो विमति राख्नुभएको छैन।’
रावल र एमालेबीच मुख्य रूपमा प्रतिनिधि सभा चुनावका बारे आरोप-प्रत्यारोप छ।
एमाले संस्थापनले उनलाई पार्टी हितविपरीत काम गरेको आरोप लगाएको छ। मंसिर ४ को प्रतिनिधि सभा चुनावमा अछाममा पार्टीका आधिकारिक उम्मेदवारलाई हराउन भूमिका खेलेको रावलमाथि आरोप छ।
रावलले भने आफूले कुनै पनि कोणबाट पार्टी हितविपरीत काम नगरेको बताएका छन्। जिल्लामा जाँदा विभिन्न दलका नेताहरूसँग भेट्नु सामान्य भए पनि चुनावमा अरू कुनै दलका उम्मेदवारलाई जिताउन आफू नलागेको उनको तर्क छ।
ग्रासरूट अभियानका क्रममा साँफेबगरमा उपाध्यक्ष पौडेलले विभिन्न आरोप लगाएपछि अर्को दिन रावलले धनगढीमा पत्रकार सम्मेलन गरेर त्यसको जवाफ दिएका थिए। पार्टीभित्र आफूलाई घचेटेको घचेट्यै गरे फरक निर्णय लिने उनको भनाइ थियो।
वार्ता टोलीसँगको कुराकानीमा यिनै विषय उठेको बताइएको छ। रावललाई झापामा वैशाख २८-३० मा हुने केन्द्रीय कमिटीको बैठक अगावै पार्टी काममा फर्काउने गरी छलफल अघि बढेको र त्यसलाई निष्कर्षमा पुर्याउने मान्यतामा आफू रहेको थापा बताउँछन्।
‘केन्द्रीय कमिटी बैठकअगावै उहाँसँगको छलफल निष्कर्षमा पुग्नुपर्छ,’ उनले भने, ‘हामी त्यसैगरी तयारी गरिरहेका छौं।’
एमालेले वार्ता टोली बनाउनुपूर्व अनुशासन आयोगका अध्यक्ष केशव बडालले पनि रावलसँग कुराकानी गरेका थिए। कुराकानीमा रावल पार्टीमा फर्कन इच्छुक नै रहेको बडालको भनाइ छ।
‘राजनीतिक, सैद्धान्तिक रूपमा उहाँको कुनै विमति छैन, उहाँका केही-केही कुरा छन्, त्यसलाई सम्बोधन नै गर्न नसकिने भन्ने होइन,’ उनले सेतोपाटीसँग भने, ‘अहिले त वार्ता टोली नै बनेकाले त्यसले छलफल गरिरहेको होला।’
यता वार्ता टोलीको नेतृत्व गरिरहेका विष्णु पौडेल पनि छलफल सकारात्मक नै रहेको बताउँछन्।
‘कुराकानी निष्कर्षमै पुगिसकेको छैन। हामी छलफलमै छौं। छिट्टै निष्कर्षमा पुर्याउँछौं,’ उनले सेतोपाटीसँग भने।
वरिष्ठ नेता मागेका हुन् रावलले?
ओली पक्षधर नेताहरूले रावलले वरिष्ठ नेता मागिरहेको बताउँदै आएका छन्। तर रावल भने दोस्रो चरणको छलफल नै हुन नसकेको बताउँछन्।
‘उहाँहरूले खबर गर्छु भन्नुभएको थियो, गर्नुभएको छैन,’ उनले भने, ‘मैले कुनै पद मागेको छैन।’
आफूले सार्वजनिक रूपमा राख्दै आएका विषय नै वार्तामा उठाएको पनि उनले बताए।
‘नेपाल राष्ट्रको हित कसरी हुन्छ भन्ने नै मेरो चिन्ता हो,’ उनी भन्छन्, ‘मुलुकको राष्ट्रियता कमजोर बनेको छ। सिमानाका विषय छन्। अन्तर्राष्ट्रिय सम्बन्ध कमजोर बनेको छ। देशको आर्थिक अवस्था कमजोर बनेको छ। यसबारे पार्टीको धारणा के हो ? यी विषय टुंगो लागेपछि बल्ल पार्टीको संगठनात्मक जीवन व्यवस्थित गर्ने कुरा आउँछ।’
