प्रधानमन्त्री पुष्पकमल दाहाल प्रचण्डले नागरिकतासम्बन्धी समस्या एक महिनाभित्र समाधान गरिसकिने बताएका छन्।
प्रतिनिधि सभाको बिहीबारको बैठकमा जनता समाजवादी पार्टीका सांसद दीपक कार्कीले सोधेको प्रश्नको जवाफ दिँदै प्रधानमन्त्री दाहालले एक महिनाभित्र नागरिकतासम्बन्धी समस्या समाधान गर्ने बताएका हुन्।
कार्कीले संसदले २ पटक पारित गरी राष्ट्रपतिकहाँ पठाए पनि नागरिकता विधेयक प्रमाणीकरण नभई रोकिएकोबारे प्रधानमन्त्री प्रचण्डको धारणा मागेका थिए।
‘प्रधानमन्त्री भएको ६ महिनाभित्र नागरिकता समस्या समाधान गर्छु भन्नुभएको थियो। तपाईं प्रधानमन्त्री भएको ५ महिना भयो अब एक महिना बाँकी छ,’ उनले भने, ‘यो अवधिमा नागरिकता सम्बन्धी समस्या समाधान गर्नुहुन्छ?’
प्रधानमन्त्री दाहालले एक महिनाभित्र यो समस्याको समाधान गरिने दोहोर्याए।
‘संसदबाट पारित गरेर राष्ट्रपतिकहाँ पठाइएको नागरिकता विधेयक न पारित गरियो न खारेज गरियो। संविधानअनुसार राष्ट्रपतिले प्रमाणीकरण गर्नुपर्ने थियो,’ उनले भने।
तत्कालीन राष्ट्रपति विद्यादेवी भण्डारीले नागरिकता विधेयक प्रमाणीकरण गरेकी थिइनन्।
उक्त विधेयक फेरि अघि बढाउने कि संसदबाट नयाँ विधेयक पारित गरेर राष्ट्रपतिकहाँ पठाउने भन्नेबारे दलहरूबीच मतभेद छ।
‘नागरिकता विधेयक राष्ट्रपति कार्यालयले होल्डमा राखेको छ। न फिर्ता, न खारेजऽ न अरू कुनै बाटो। त्यसको पोजिसन के हुने? होल्ड विधेयक प्रमाणिकरण गर्ने वा के गर्ने भन्नेबारे छलफल चलिरहेको छ,’ दाहालले भने, ‘हामीले बार एसोसिएन लगायतसँग छलफल गर्दा राष्ट्रपतिले प्रमाणिकरण गर्न केही बाधा छैन भन्ने सुझाव आएको छ।’
आफूले उक्त सुझाव राष्ट्रपति रामचन्द्र पौडेललाई सुनाएको उनले बताए। ‘राष्ट्रपतिले पनि नागरिकता विधेयकबारे कानून विदहरूसँग राय लिइरहनुभएको छ, उहाँ अध्ययन प्रक्रियामै हुनुहुन्छ,’ उनले भने।
सदनबाट संकल्प प्रस्ताव ल्याएर नागरिकता विधेयक पारित गर्न राष्ट्रपतिलाई आग्रह गर्न सकिने विकल्पसमेत प्रधानमन्त्रीले सुनाए।
साथै मन्त्रिपरिषदबाट निर्णय गरेर पनि राष्ट्रपतिलाई नागरिकता विधेयक पारित गर्न आग्रह गर्न सकिने उनको भनाइ थियो।
‘विधेयक खारेज गरेर, अर्को विधेयक फेरि संसदमा ल्याएर अघि बढाउन पनि सकिन्छ,’ उनले भने, ‘मृत भइसकेको नागरिकता विधेयक जीवित मान्न सकिन्न भन्ने पनि सदनभित्र र बाहिर चर्चा छ। के गर्ने एक महिनाभित्र यो विषय टुंगिन्छ।’
