जथाभाबी स्वास्थ्य उपकरण खरिद गर्ने अस्पतालहरूलाई सरकारले स्पष्टीकरण सोध्ने भएको छ।
स्वास्थ्य तथा जनसंख्या मन्त्री मोहनबहादुर बस्नेतले आज पत्रकार सम्मेलन गरेर जथाभाबी उपकरण किन्ने अस्पताललाई स्पष्टीकरण सोधिने बताएका हुन्।
‘स्थान र जनशक्ति नभएर पनि स्वास्थ्य उपकरण खरिद गरेका अस्पतालहरूलाई स्पष्टीकरण सोधिन्छ,’ उनले भने।
कतिपय अस्पतालले जथाभाबी रूपमा स्वास्थ्य उपकरण खरिद गरेको पाइएकोले अबदेखि स्वास्थ्य उपकरण खरिद गर्दा न्यूनतम सेवा मापदण्डले औंल्याएअनुसार मन्त्रालयको समन्वयमा मात्रै खरिद गर्नुपर्ने बताए।
दुई वर्षसम्म पनि प्रयोग नभएका वा हुन नसकेका सामानहरू स्वास्थ्य सेवा विभागले फिर्ता लिएर आवश्यकताअनुसार अरू अस्पतालमा हस्तान्तरण गरिने पनि बताएका छन्।
उनले आउँदा २ वर्षको कार्ययोजना बनाएर पेश गर्न अस्पतालहरूलाई निर्देशन पनि दिएका छन्।
