प्रमुख प्रतिपक्षी नेकपा एमालेका अध्यक्ष केपी शर्मा ओलीले देशको अर्थतन्त्र संकटको डिलमा पुगेको बताएका छन्।
सरकारका नीति तथा कार्यक्रममाथि आज प्रतिनिधि सभा बैठकमा टिप्पणी गर्दै ओलीले अर्थतन्त्र उकास्दै गरेको एमालेको सरकारलाई ढालेर कांग्रेस-माओवादीसहित नयाँ गठबन्धन बनेको र त्यसले जनतालाई दु:ख दिइरहेको बताए।
‘नेकपा एमालेको सरकारलाई विस्थापन गरी बनेको कांग्रेस माओवादीसहितको गठबन्धन सरकार नै हाम्रो अर्थतन्त्रलाई संकटको डिलमा पुर्याउने प्रमुख कारक हो,’ उनले भने।
देशको अर्थतन्त्र ध्वस्त बनाउने गठबन्धन बनेको उनको दाबी थियो। ‘प्रधानमन्त्रीलाई लागेको होला, सरकार राम्रो छ भनिदिए हुन्थ्यो। तथ्यांकले अर्कै कुरा बोल्छ कसरी बोल्ने?,’ उनले भने, ‘देश र जनतालाई दुख दिन र दु:खको कारण भएको छ अहिलेको गठबन्धन।’
