राष्ट्रिय जनमोर्चाका अध्यक्ष तथा सांसद चित्रबहादुर केसीले मन्त्री, सांसदहरू नै सहकारी चलाउने गरेको बताएका छन्।
सहकारीहरू समस्याग्रस्त हुँदै वचतकर्ताको निक्षेप जोखिममा परेका बेला केसीले नियमन हुन नसकेको बताएका हुन्।
प्रतिनिधि सभाको आइतबारको बैठकमा नीति तथा कार्यक्रममाथि टिप्पणी गर्र्दै उनले आफ्नो पालामा ऐन बनाउन नदिएको तीतो पोखे।
‘आजै पनि हामीलेचाहिँ सुनिरहेका छौं, सहकारीका नाममा १४ अर्ब हिनामिना गरिरहेका छन्। हामी संसद्मै छौँ, सरकारमा बस्नेहरूले ठुल्ठूला कुरा गरेको सुनिन्छ। तर, सहकारीका नाममा नागरिकलाई लुट्नेलाई किन कारबाही गर्न सक्दैन भने मेरो एउटा तीतो अनुभव छ,’ उनले भने, ‘सहकारी खुद सत्ता र शक्तिमा बस्नेहरूले सञ्चालन गरिरहेका छन्। सहकारीको ऐन बनाउने बेलामा सांसदहरू नै त्यसको विरोध गर्ने, कारण के रहेछ भने सांसद्हरू नै सहकारी सञ्चालक, मन्त्रिपरिषद्मा बसेकाहरू पनि सहकारी सञ्चालक छन्। नभए पनि त्यसबाट फाइदा उठाउनेहरू भएका कारण ऐन बन्नै दिइएन।’
उनले आत्मनिर्भर र स्वाधीन राष्ट्रिय अर्थतन्त्र बनाउने दिशामा नीति कार्यक्रम अघि बढ्नुपर्ने पनि बताए।
