नेपाली कांग्रेस रूपान्तरण अभियानले जेठ १६ गते काठमाडौंमा भेला गर्ने भएको छ।
आइतबार बत्तिसपुतलीको अनुपम फुडल्याण्डमा भएको बागमती प्रदेश भेलाले जेठ १६ मा कार्यक्रम गर्ने निर्णय गरेको हो।
नेता जगदीश्वरनरसिंह केसीले कांग्रेस रूपान्तरणका गर्न प्रदेश र जिल्लाहरूमा कार्यक्रम गर्न लागिएको बताए।
बागमती प्रदेशभित्रका जिल्लाका नेता तथा कार्यकर्ताको उपस्थितिमा जेठ १६ मा काठमाडौंमा कार्यक्रम गरिने उनको भनाइ छ।
रूपान्तरण अभियानमा सभापति शेरबहादुर देउवालगायत पदाधिकारीलाई खबर नगरिने भएको छ।
‘अहिलेकै कार्यशैलीले कांग्रेस रूपान्तरण हुँदैन,’ उनले भने, ‘प्रदेश र जिल्लाहरूमा पुगेर हामी नेता तथा कार्यकर्तालाई भेट्छौं। कुराहरू सुन्छौं र पार्टी रूपान्तरण गर्न दबाब दिन्छौं।’
पार्टीका शीर्ष नेताहरूले कार्यशैली सुधार गर्नुपर्ने उनले बताए। ‘नेताहरूले आफूबाटै रूपान्तरणको सुरूवात गर्नुपर्छ,’ उनले भने।
कांग्रेस रूपान्तरण अभियानले सातै प्रदेशमा जेठ महिनामा भेला गर्ने यसअघि नै घोषणा गरेका थिए।
रूपान्तरण अभियानमा केन्द्रीय सदस्य मधु आचार्य, अजयबाबु शिवाकोटी, नेताहरू गुरूराज घिमिरे, भूपेन्द्रजंग शाही, रञ्जित कर्णलगायत छन्।
