उत्तर कोरियाले भागेर आएका एक जना अमेरिकी सैनिकलाई छोडिदिएको छ।
समाचार संस्था एपीका अनुसार गत जुलाईमा दक्षिण कोरियाबाट आएका प्राइभेट किङलाई उत्तर कोरियाले बुधबार छोडिदिएको हुन्।
उनलाई उत्तर कोरिया र चीनको सीमा छोडिएको थियो। प्योङयाङस्थित स्विडेनको दूतावासका अधिकारीहरूले उनलाई सीमासम्म ल्याएका थिए। त्यसपछि चीनका लागि अमेरिका राजदूतलगायत अधिकारीले उनलाई बुझेका थिए।
अमेरिकाले स्विडेन र चीनको सहयोगमा किङलाई सकुशल फिर्ता ल्याउन सकिएको बताएको छ।
अमेरिका र उत्तर कोरियाबीच कूटनीतिक सम्बन्ध छैन। अमेरिकासँग तिक्ततापूर्ण सम्बन्ध भएको उत्तर कोरियाले भागेर आएका सैनिकलाई मोलमोलाइको माध्यम बनाउन सक्ने अनुमान गरिएको थियो। तर बदलामा केही कुरा नलिईकनै उत्तर कोरिया किन उनलाई छोड्न तयार भयो भन्ने खुल्न सकेको छैन। २३ वर्षका किङसँग अमेरिकासम्बन्धी कुनै सूचना नभएको ठानेर पनि उत्तर कोरियाले उनलाई छाडिदिएको हुनसक्छ।
गत जुलाई १८ मा अमेरिका फर्किने जहाज चढ्न छोडेर किङ उत्तर कोरियातिर लागेका थिए।
उत्तर कोरियाली अधिकारीहरूले गरेको अनुसन्धानमा किङले अमेरिकी सेनामा हुने दुर्व्यवहार र अमेरिकी समाजमा हुने रंगभेदका कारण आफूले उत्तर कोरिया वा अर्को मुलुकमा शरण लिन चाहेको बताएको थिए।
भएको के थियो?
किङ सन् २०२१ जनवरीमा अमेरिकी सैनिकमा भर्ती भएका थिए। उनी फर्स्ट ब्रिगेड कम्ब्याट टिममा थिए।
उनको ब्रिगेड २०२२ को फेब्रुअरीमा दक्षिण कोरिया जान थालेको हो।
गत अक्टोबरमा स्थानीय कोरियालीसँग उनको झगडा परेको थियो। त्यसक्रममा उनले प्रहरीको कारमा क्षति पुर्याएपछि उनीमाथि कारबाही भएको थियो।
उनको ब्रिगेडका अरू सैनिक अमेरिका फर्किने बेला उनी कोरियाको जेलमा बस्नु परेको थियो।
जेलबाट छुटेपछि उनी अमेरिका फर्किने योजना थियो। उनलाई अमेरिकाको टेक्ससमा सैनिकसम्बन्धी अनुशासनको कारबाही हुने तयारी थियो।
दक्षिण कोरियाको इन्छन अन्तर्राष्ट्रिय विमानस्थलसम्म उनलाई अमेरिकी सेनाले स्कर्टिङ गरेर ल्याएको थियो।
विमानस्थलको सुरक्षा जाँचपासपछि उनलाई सैनिक सुरक्षा दिन सकिएको थिएन।
विमानस्थलको सुरक्षा जाँच पास गरेका किङ भने जहाजमा चढेनन्। बरू विमानस्थलबाट बाहिर निस्किएर उत्तर कोरियाको सीमातिर लागे।
सुरक्षा जाँच पास गरिसकेका उनी विमानस्थलबाट कसरी बाहिर निस्किए भन्ने प्रष्ट भइसकेको छैन।
उत्तर कोरियाको सीमासम्म उनी पर्यटकको एउटा समूहसँग घुम्न भनेर गएका थिए। उत्तर र दक्षिण कोरियाको सीमा छुट्याउने ठाउँमा चार किलोमिटर चौडा डिमिलिटराइज्ड जोन छ। त्यहीँ भित्र पान्मुनजोम भन्ने ठाउँ पर्छ। त्यहाँबाट उत्तर कोरियाको जमिन देखिन्छ। पर्यटकहरू उत्तर कोरियालाई नजिकबाट हेर्न त्यो क्षेत्रको भ्रमण गर्छन्।
दिनभरि समूहमा पान्मुनजोम घुमेका किङ साँझतिर अचानक उत्तर कोरियातिर लागे।
‘हामीले दायाँतिरबाट हा.. हा.. गरेको आवाज सुन्यौं। दिनभरि हामीसँगै घुमेका एक युवक दुई भवन पार गरेर उत्तर कोरियातिर पुगे,’ किङको समूहमा रहेका एक पर्यटकले सामाजिक सञ्जालमा लेखेका छन्,‘के भएको हो भनेर हामी सबै एकछिन अचम्ममा पर्यौं।’
उनको समूहमा रहेकी अर्की एक जना पर्यटकले सुरूमा उनी उत्तर कोरियातिर जाँदा टिकटक भिडिओ बनाउन गएजस्तो लागेको बताएकी छन्।
‘सुरूमा त मलाई के गरेको होला भन्ने लागेको थियो,’ उनले भनेकी छन्,‘केहीबेर पछि त उनी उत्तरतिर बेस्सरी दौडिए, रोकिँदै रोकिएनन्।’
दक्षिण कोरियामा खटिएका अमेरिकी सैनिक जानकारीबिनै उत्तर कोरिया गएको यो पहिलो पटक भने होइन। यसअघि पनि केही अमेरिकी सैनिकहरू उत्तर कोरिया गएका थिए।
तीमध्ये सबैभन्दा चर्चित घटना सन् १९६५ को अमेरिकी आर्मी सर्जेन्ट चार्ल्स रोबर्ट जेनकिन्सको हो। उनले भियतनाम युद्ध लड्न जानुपर्ने भन्दै अमेरिकी सैनिक त्यागेका थिए। दक्षिण कोरियाबाटै उनी उत्तर कोरिया गएका थिए।
उत्तर कोरियामा हुँदा उनले उत्तर कोरियाली सैनिकलाई अंग्रेजी भाषा पढाउने र अमेरिका विरोधी प्रोपोगान्डामा अभिनय गर्ने काम गरेका थिए। झन्डै ४० वर्षपछि सन् २००४ मा उनलाई उत्तर कोरियाले देशबाट बाहिर जान अनुमति दिएको थियो।
