प्रधानमन्त्रीसमेत रहेको नेकपा (एमाले) का अध्यक्ष केपी शर्मा ओलीले वरिष्ठ उपाध्यक्ष ईश्वर पोखरेलले बाटो बिराएको बताएका छन्। एमाले बागमती प्रदेश र काठमाडौं जिल्ला कमिटीका अगुवा नेता–कार्यकर्तालाई बुधबार साँझ बोलाएर प्रधानमन्त्री निवास बालुवाटार अध्यक्ष ओलीले पोखरेलले बाटो बिराएर कतै नपुग्ने टिप्पणी गरेका हुन्।
उक्त भेटमा एमाले पोलिटब्युरो सदस्य रामेश्वर फुयाल, कृष्ण राई, काठमाडौं पार्टी इन्चार्च आनन्द पोखरेल, केन्द्रीय सदस्य सुरेन्द्र माननन्धर, विद्यासुन्दर शाक्यलगायत काठमाडौं, ललितपुर र भक्तपुरका अगुवा नेता–कार्यकर्ता उपस्थित थिए। त्यस भेटमा अध्यक्ष ओलीले व्यक्त गरेका कुराहरू काठमाडौं अध्यक्ष दीपक निरौलाले फेसबुकमार्फत् सार्वजनिक गरेका छन्।
‘ईश्वर पोखरेल कहाँ पुग्नुहुन्छ?,’ ओलीको भनाइ उद्धृत गर्दै निरौलाले लेखेका छन्, ‘बाटो बिराएर हिँड्नुभएन।’
वरिष्ठ उपाध्यक्ष पोखरेलले दोस्रो विधान महाधिवेशनमा फरक मत लैजाने तयारी गरेका छन्। केन्द्रीय कमिटीको नवौं बैठकमा मौन बसेका पोखरेलले १३ गते डाकिएको केन्द्रीय कमिटी बैठकमा भने आफ्ना असहमति राख्नेसमेत तयारी गरेका थिए।
एमालेले शुक्रबारको केन्द्रीय कमिटी बैठक स्थगित गरिसकेको छ। वरिष्ठ उपाध्यक्ष पोखरेलले पछिल्लो समय ओलीलाई चुनौती दिइरहेका छन्। उनले अध्यक्ष ओलीले एमालेले मार्गदर्शक सिद्धान्तका रूपमा अवलम्बन गरेको मदन भण्डारीले अघि सारेको जनताको बहुदलीय जनवादमाथि नै प्रश्न उठाउन सक्ने आशयसमेत प्रकट गरिरहेका छन्।
त्यसैले ओलीले दोस्रो विधान महाधिवेशनमा फरक नलैजान चुनौती दिएका हुन्। उनले आउँदो विधान महाधिवेशन एकताको विधान महाधिवेशन हुने र त्यहाँ भाँजो हालिए महाधिवेशनमा हिसाबकिताब गर्ने चेतावनी दिएको निरौलाको दाबी छ।
‘सही विचार प्रस्तुत गर्छु। फरक मत राखिरहनु पर्दैन। म नै राम्रो विचार लैजान्छु,’ ओलीको भनाइ उद्धृत गर्दै निरौलाले भनेका छन्, ‘यो इतिहास हो। इतिहासका रूपमा आउँछ। यो नीतिका रूपमा आउँछ। विधान महाधिवेशन एकताको अधिवेशन हुन्छ। अन्यथा गरे महाधिवेशनमा हिसाबकिताब गरिन्छ।’
अध्यक्ष ओलीले विधान महाधिवेशनमा एक दिन दस्तावेज प्रस्तुत गर्ने, एक दिन छलफलका लागि छुट्टयाइने र अर्को दिन पारित गर्ने तयारी रहेको समेत बताएका छन्।
त्यही भेटमा ओलीले आफूलाई पूर्वराष्ट्रपति भण्डारीबाहेक कसैले पनि चुनौती दिन नसक्ने बताएका थिए।
‘विद्याजीबाहेक कसैको दम छैन,’ ओलीले भनेका थिए, ‘उहाँले छाडे सबै कुरा मिल्छ। विद्याजीको सम्मानका लागि उहाँलाई नउचालौं। विद्या भण्डारी पार्टीको सम्पत्ति हो। उहाँको सम्मानका लागि पनि उहाँलाई नउचालौं। लालगेडी भएर पार्टी चल्दैन। त्यसैले विद्याजीको कुनै सम्भावना छैन।’
बागमतीका अगुवा नेता–कार्यकर्तासँगको भेटमा भावनामा बहकिएर कतै नपुगिने बताएका थिए। ओलीले मदन भण्डारीको विचार पवित्र भएको तर उनको घरलाई सम्मान गरिरहन नसकिने समेत बताएको निरौलाले भनेका छन्।
‘भावनामा बहकिएर हुँदै। मदन भण्डारीको विचार पवित्र हो, घर होइन,’ ओलीको भनाइ उद्धृत गर्दै निरौलाले उल्लेख गरेका छन्, ‘जनताको बहुदलीय जनवाद परिवारको सम्पत्ति होइन। जनताको बहुदलीय जनवादलाई मदन भण्डारी फाउन्डेसनले बचाउने पनि होइन। पार्टीमा मदन जयन्तीसमेत मनाउने अवस्था नबनेपछि मैले नै फाउन्डेसन खोलेको हुँ। अरूले राजमाता भनिरहँदा मैले विद्याजीलाई अघि बढाएको हुँ। मैले जति सम्मान उहाँलाई अरू कसैले गरेको छैन होला, विद्याजीलाई साथ दिँदा म अपमानित हुनुपरेको छ। अहिले पार्टीका पक्षमा नबोलेकाहरूलाई मेराविरूद्ध भेला गरेर हिँड्नुभएको छ। यसर्थ नेकपा (एमाले) मा आएर अध्यक्ष हुन सम्भव छैन। विद्याजीलाई अध्यक्ष दिन सकिँदैन। चुनावै भयो भने पनि हार्नुहुन्छ।’
पार्टीभित्रका केही तत्त्वहरूले पूर्वराष्ट्रपतिको फोटो राखेर धन्दा गर्न थालेको उनले टिप्पणी गरेका थिए।
‘च्यासलले सदस्यता खायो भन्नुहुन्छ। सदस्यता खाएको छैन। पार्टीमा निवेदन दिनु भएकै छैन। सदस्यता लिने प्रकृया मिलेन। पत्रकारहरूले सदस्यता दिने पनि होइन,’ ओलीले भनेका थिए।
गत साउन ४ गते आफूले बालुवाटार बोलाएको तर आउन नमानेपछि च्यासल पार्टी कार्यालयमा भेट भएको पनि ओलीले बताएका थिए। ओलीले भण्डारीको सदस्यता कुनै हालतमा नवीकरण नहुने र पार्टीले निर्णय गरेअनुसार हुने बताएका थिए।
यसअघि भेटमा भण्डारीले मुखै फोरेर ‘मलाई सहयोग गर्नुस्, तपाईंले चलाउन सक्नुहुन्न’ भनेको समेत ओलीले बताएका थिए।
‘मलाई सहयोग गर्नुस्। तपाईं चलाउन सक्नुहुन्न भन्नुभयो। भैले भ्रममा नरहनुस्, तपाईंसँग पार्टी अध्यक्ष चलाउने अनुभव छैन भनेँ,’ ओलीले भनेका थिए।
जबाफमा भण्डारीले आफूसँग चुनावै लड्छु भनेको ओलीले बताएका थिए। ‘चुनाब लड्ने त भन्नु भयो, तर यो पार्टीमा चुनाव लड्नुपर्दैन भनेँ,’ ओलीको भनाइ थियो। उनले पूर्वराष्ट्रपति भइसकेको व्यक्तिले अशोभनीय गतिविधि गरिरहेको भन्दै आपत्ति पनि प्रकट गरेका थिए।
यो पनि:
आफ्नै बोलीको गलपासोमा ओली
थापागाउँबाट च्यासलतिर फर्किएर भण्डारी–पोखरेलले ओलीविरूद्ध फेरि खोले 'फायर'
सुरेन्द्र पाण्डे र युवराज ज्ञवालीको फरक मतलाई एमालेले दिएन मान्यता
-1746009348.jpg)
