चीनको ल्हासाबाट काठमाडौंका लागि उडेको हिमालयन एयरलाइन्सको न्यारोबडी जहाज पोखरा डाइभर्ट गरिएको छ।
प्रदर्शनका क्रममा तोडफोड र आगजनी भएपछि जहाज काठमाडौंमा अवतरण गर्न नसक्ने भएपछि पोखरा डाइभर्ट भएको पोखरा क्षेत्रीय अन्तर्राष्ट्रिय विमानस्थलले जनाएको छ।
विमानस्थलका प्रबन्धक सूर्य खत्रीका अनुसार ६५ जना यात्रु लिएर आएको उक्त जहाज अहिले पोखरा अन्तर्राष्ट्रिय विमानस्थलमै छ।
काठमाडौंको त्रिभुवन अन्तर्राष्ट्रिय विमानस्थल भोलि बिहान साढे २ बजेसम्मका लागि पूर्ण रूपमा बन्द गर्ने नेपाल नागरिक उड्ययन प्राधिकरणले निर्णय गरेको छ।
विमानस्थल पुन सञ्चालन भएपछि यात्रु लिएर उक्त विमान काठमाडौं जाने विमानस्थलका प्रबन्धक सूर्य खत्रीले जानकारी दिए।
ल्हासाबाट सोमबार पोखरा आएको हिमालयन एयरलाइन्सको अर्को विमान भने मंगलबार बिहान ल्हासा फर्किसकेको खत्रीले बताए।
दिउँसो साढे २ बजेतिर पोखरामा ल्याण्ड भएको सोही एयरलाइन्सको अर्को जहाज विमानस्थल सञ्चालन भएपछि मात्र काठमाडौंका लागि उड्ने उनको भनाइ छ।
काठमाडौंमा भएको आगजनीले आकाश धुँवाले ढाकिएको भन्दै प्राधिकरणले आन्तरिक र बाह्य उडान बन्द गरेको छ।
-1746009348.jpg)
