नेपाली कांग्रेसका नेता शेखर कोइरालाले पार्टी नवनिर्माणमा जुट्न आह्वान गरेका छन्।
शनिबार पछिल्लो राजनीतिक घटनाक्रमबारे धारणा सार्वजनिक गर्दै कोइरालाले कांग्रेस हिजो कहाँ चुक्यो, के भयो र के हुनुपर्थ्यो भन्नेमा बहस भन्दा पनि नयाँ बनेको परिस्थितिमा कसरी अगाडि बढ्ने भन्नेमा ध्यान दिनुपर्ने बताएका हुन्।
‘यस विषम परिस्थितिमा हाम्रो पार्टीका अग्रजहरुवाट हामी शिक्षा लिन सक्छौं । हाम्रा अग्रजहरु विपी कोइराला, गणेशमान सिंह , कृष्णप्रसाद भटराई, गिरिजाप्रसाद कोइराला लगायत अनेकन् योद्धाहरुले लोकतान्त्रिक आन्दोलनमा छोडेको पदचिन्हबाट भावी कांग्रेसको दिशा निर्धारण गर्नुपर्दछ,’ उनले भनेका छन्।
कोइरालाले लोकतान्त्रिक समाजवादको दियोलाई हिमाल, पहाड र तराई- मधेसमा कांग्रेस नेता र कार्यकर्ताहरुले अनेकन कष्ट, यातना र बलिदान दिएर निभ्न नदिएको विषय नै कांग्रेसको प्रेरणाको स्रोत रहेको बताएका छन्।
‘आज फेरी एकपटक लोकतान्त्रिक इतिहाँसका ति योद्धा, नेता र शहिदहरुलाई सम्झेर कांग्रेसले भावी दिनमा आफ्नो भूमिका तय गर्नुपर्नेछ,’ उनले भनेका छन्, ‘हामीसँग आँसु बगाएर र पश्चाताप गरेर खेर फाल्ने समय छैन। निश्चय नै विगतमा हामी आम नेपाली दाजुभाइ दिदीबहिनीहरुले गरेको अपेक्षा अनुरुप खरो उत्रिन सकेनौं होला । यसका लागि गर्नुपर्ने प्रायश्चित गर्न हामी पछि पर्दैनौं, गर्नुपर्छ,’ उनले भनेका छन्।
उनले सत्ता र पार्टीको केन्द्रमा को छ भन्ने विषय पनि अब गौण बनेको बताएका छन्। बरू जनताको केन्द्रमा बस्ने अभियानमा कांग्रेस लाग्नुपर्ने उनको भनाइ छ। यसका लागि ‘न दाजुको न भाइको, कांग्रेस कांग्रेसजनको’ भनेर अगाडि बढ्नुपर्ने उनले बताएका छन्।
‘जनताको भरोसा र विश्वासलाई शिरोधार्य गर्दै अगाडि बढे राष्ट्र निर्माणको अभिभारा स्वतः तपाई हाम्रो जिम्मेवारीमा आउँछ । विपी कोइरालाको दिव्यवाणी सम्झौं ‘नेपाल पक्कै ब्यूँझिन्छ जय नेपालको नाराले’ फेरी एकपटक देशभरि यसलाई बुलन्द गरौं,’ उनले भनेका छन्।
उनले विपीका बुवा कृष्णप्रसाद कोइरालाले सय वर्ष भन्दा अगाडि निर्माण गरेको विराटनगरको ‘कोइराला निवास’सँग हजारौं लोकतान्त्रिक योद्धाहरुको भावना जोडिएको बताउँदै अहिले त्यसलाई जलाइएको बताए।
‘कोइराला निवासको भौतिक संरचना खरानी हुनसक्छ । तर विचार र लोकतान्त्रिक आन्दोलनलाई जलाउन सकिन्न । विपी विचार मर्न सक्तैन । पिताजीको सामाजिक आन्दोलनको विज र राज्यलाई प्रश्न गर्ने क्षमताले विश्राम किमार्थ लिदैन । कोइराला निवासको खरानी विजवाट नुतन कांग्रेसको नवनिर्माणमा जुट्ने प्रण गरौं,’ उनले आह्वान गरेका छन्।
कोइरालाले मुलुकभित्र उत्पन्न राजनीतिक परिस्थितिलाई सतर्कतापूर्वक हेर्नुपर्ने पनि बताएका छन्। जेनजी आन्दोलनबाट प्रस्फुटन भएको नयाँ सरकारले आम नागरिकको भरोसा र विश्वास जितेर काम गर्छ भन्नेमा पनि विश्वस्त रहेको उनले बताएका छन्।
भदौ २४ गते जेनजीका नाममा भएको सार्वजनिक सम्पत्ति लुटपाट, तोडफोड र आगजनिसँगै व्यक्तिको सम्मानमा पुर्याएको पासविक व्यवहार तथा समाजमा फैलाइएको त्रासलाई समाज परिवर्तन भन्न नसकिने उनले बताएका छन्।
कोइरालाले कांग्रेस सभापति शेरबहादुर देउवा र उनकी श्रीमती आरजु राणा देउवामाथि भएको हातपातलाई जघन्य अपराध भनेका छन्।
‘सभापति शेरबहादुर देउवा जसको लोकतान्त्रिक आन्दोलनमा अतुलनीय त्याग, संघर्ष र इतिहास छ। उहाँमाथि घरमा बसिरहेको समयमा पत्नी समेतमाथि गरिएको हातपात र लुटपाटलाई म जघन्य अपराधको कोटीमा राख्छु। यसको जति निन्दा गरे पनि कम हुन्छ,’ उनले भनेका छन्।
उनले युवाहरूमा नेपाली समाजमा परिवर्तनको तीव्र चाहना रहेको पनि बताएका छन्।
‘मुख्य कुरो आज नेपाली समाजमा परिवर्तनको तिव्र चाहना छ । हाम्रा युवाहरु आफ्नै देशमा आफनो सुन्दर र समृद्ध भविष्यको खोजीमा छन । कांग्रेस त्यसको माध्यम बनोस र बन्नुपर्छ भन्ने आम नागरिकको चाहना छ। हाम्रो भावी ध्येय यसैमा केन्द्रित हुनुपर्छ भन्ने मलाई लाग्छ,’ उनले भनेका छन्।
कोइरालाले समयको पदचाप अनुरूप हिँड्न नजान्दा जेनजीको आन्दोलनले दुई ठूला राष्ट्रिय दललाई सत्तावाट बाहिरिन वाध्य पारेको पनि बताए।
‘नेपाली समाज र यहाँका उर्जावान युवाहरु एकातिर छन्। कांग्रेसको सोच र दृष्टिकोण अर्कोतिर बग्यो, केही रणनीतिक भूलहरु भए, हामी चुक्यौं। समाज र युवाको भावनालाई राष्ट्रिय भावधारामा समाहित गर्दै एउटा शक्तिशाली राष्ट्र निर्माणमा हामी समर्पित हुनेछौं भन्ने प्रण गर्छौं,’ उनले भनेका छन्।
-1746009348.jpg)
