मधेस प्रदेशमा आफ्नो एक मात्र सांसद कञ्चन विच्छा पार्टी नीतिविपरीत सरकारमा सहभागी भएपछि त्यसले राप्रपाभित्र तरंग उत्पन्न गरेको छ।
राप्रपाले प्रदेश खारेजीजस्ता एजेन्डामा आन्दोलन गरिराखेका बेला विच्छा सरकारमै सामेल भएकी हुन्।
मधेस प्रदेश प्रमुख सुमित्रा सुवेदी भण्डारीले एमाले संसदीय दल नेता सरोजकुमार यादवलाई ठूलो दलको हैसियतमा सोमबार बिहान झिसमिसेमै मुख्यमन्त्री पदमा नियुक्त गरी एक होटलमा शपथग्रहण गराएकी थिइन्।
लगत्तै मुख्यमन्त्री यादवले मन्त्रिपरिषद विस्तार गरे। एमाले सांसद लखनदास तत्मा, नेपाल संघीय समाजवादी पार्टीकी विमला अन्सारी र राष्ट्रिय प्रजातन्त्र पार्टीकी कञ्चन बिच्छालाई त्यही होटलमै मन्त्री नियुक्त गरी शपथ गराइएको थियो।
प्रदेश प्रमुखले बर्दिबास र सिन्धुलीको सिमानामा रहेको पानस होटल पुगेर मुख्यमन्त्री र मन्त्रीहरूलाई शपथ गराएकी थिइन्।
मधेस प्रदेश सभामा एक-एक सांसद भएको नेपाल संघीय समाजवादी पार्टी र राप्रपालाई मुख्यमन्त्रीले मन्त्री नियुक्त गरेका थिए।
राप्रपाले मधेस सरकारमा सहभागी हुनेबारे नेतृत्वसँग परामर्श गरेको थिएन। राप्रपाका संघीय तथा प्रदेश सांसदहरूले भदौ २४ गते नै पदबाट सामूहिक राजीनामा घोषणा गरेका थिए।
सांसदबाट राजीनामा दिए पनि राप्रपा प्रदेश सांसदहरू प्रदेश सभामा सहभागी भइरहेका छन् भने तलबभत्ता र गाडी लगायत सुविधा पनि लिएका छन्।
मधेसमा नयाँ सरकार बनेको र पार्टी पनि सरकारमा सामेल भएको कुरा राप्रपा अध्यक्ष राजेन्द्र लिङ्देनले सोमबार बिहान मात्रै थाहा पाएका थिए।
एमाले नेतृत्वको सरकारमा राप्रपा पनि सहभागी भएको र विच्छा मन्त्री बनेको खबर सञ्चारमाध्यमबाट महामन्त्री तथा सचिवालय प्रमुख राजेन्द्र गुरूङले सुनेपछि उनले फोन गरेर अध्यक्ष लिङ्देनलाई जानकारी गराएका थिए।
‘अध्यक्षज्यू व्यायम गर्दै हुनुहुन्थ्यो, महामन्त्री राजेन्द्र गुरूङजीबाट फोन आयो, उहाँले मधेसमा पार्टीकी सांसद कञ्चन विच्छा मन्त्री बनेको कुरा सुनाउनुभयो,’ अध्यक्ष लिङ्देननिकट एक नेताले सेतोपाटीसँग भने, ‘त्यसपछि अध्यक्षज्यूले सरकारबाट फिर्ता हुन निर्देशन दिनुभएको थियो।’
अध्यक्ष लिङ्देनले यो कुरा सामाजिक सञ्जालमा पनि राखेका छन्।
‘मधेस प्रदेश सरकारमा राप्रपाको सहभागिताप्रति हाम्रो गम्भीर ध्यानाकर्षण भएको छ। यो अनुशासनको गम्भीर उल्लंघन हो। राप्रपाका सदस्यलाई तत्काल सरकारबाट फिर्ता हुन निर्देशन छ,’ लिङ्देनले भनेका थिए, ‘अन्यथा विधान बमोजिम कारबाही हुने जानकारी गराउँछु।’
सरकारबाट तत्काल फिर्ता हुन अध्यक्ष लिङ्देनले निर्देशन दिए पनि मन्त्री विच्छाले पदबाट राजीनामा दिएकी छैनन्।
यसबीचमा मन्त्री विच्छाका श्रीमान् समेत रहेका राप्रपा केन्द्रीय सदस्य रामनारायण साहबीच टेलिफोन संवाद भएको थियो। रामनारायणले मन्त्रीसँग आवश्यक कुराकानी भइरहेको र सरकारबाट फिर्ता आउने सन्दर्भमा निर्णय लिन केही समय मागेका थिए।
२९ वर्षकी विच्छा पार्टीनिकट राष्ट्रिय प्रजातान्त्रिक महिला संगठनकी केन्द्रीय सदस्य छिन्। उनी २०७९ मंसिरमा भएको प्रदेश सभा चुनावबाट समानुपातिकतर्फ सांसद भएकी हुन्।
महोत्तरीको जलेश्वरमा जन्मेकी उनको घर सिराहा मिर्चैया नगरपालिका ५ हो। उनी अधिवक्तासमेत हुन्। उनको परिवारका सदस्यहरू लामो समयदेखि राप्रपाको राजनीतिमा सक्रिय छन्। श्रीमान् र ससुरा पनि राप्रपामा सक्रिय छन्।
मधेस सरकारकी मन्त्री नियुक्त विच्छा राप्रपा पूर्वअध्यक्ष प्रकाशचन्द्र लोहनीनिकट छिन्। तर आफूलाई अध्यक्ष राजेन्द्र लिङ्देनले अघि बढाएको उनले बताउने उनीनिकट बताउँछन्।
पार्टी केन्द्रसँग आवश्यक परामर्शबिनै मधेस सरकारमा सहभागी भएको सन्दर्भमा मन्त्री विच्छासँग कुराकानी गर्न हामीले सोमबार बिहानदेखि अपराह्नसम्म पटक पटक टेलिफोन गरे पनि उनीसँग कुरा हुन सकेन।
मन्त्री विच्छाका श्रीमान् समेत रहेका राप्रपा केन्द्रीय सदस्य रामनारायण साहसँग भने हाम्रो कुराकानी भयो।
रामनारायणले भने मधेस सरकारमा जाने विषयमा पार्टीका नेताहरूसँग केही दिनदेखि कुराकानी चल्दै आएको दाबी गरे।
‘मधेस सरकारमा जाने विषयमा सामान्य छलफल हुँदै आएको थियो। एक दुई जना शीर्ष नेताहरूसँग कुरा गर्दा केही सम्भावनाका कुरा भएका थिए, तर निर्णय दिइसक्नु भएको थिएन,’ रामनारायणले सेतोपाटीसँग भने, ‘त्यही बीचमा नयाँ सरकार बन्ने परिस्थिति बन्यो, सरकारमा जाने कुरा भयो।’
आफूले सोमबार बिहान अध्यक्ष लिङ्देनलाई टेलिफोन गरेर मधेसमा उत्पन्न नयाँ राजनीतिक परिस्थितिबारे जानकारी गराएको उनले बताए।
‘अध्यक्षज्यूले राजीनामा दिएर सरकारबाट फिर्ता हुनुपर्छ भन्नुभयो, मैले मन्त्रीजीसँग कुरा गर्छु, एक दुई दिन समय दिए सजिलो हुन्थ्यो भन्ने आग्रह गरेको थिएँ,’ उनले भने, ‘अध्यक्षज्यूले ढिलो नगरौं, सरकारबाट फिर्ता भइहालौं भन्नुभयो।’
उनले मधेस सरकारबाट फिर्ता हुने कि के गर्ने भन्ने विषयमा मधेस प्रदेश पार्टी समितिमा रहेका नेताहरूसँग पनि कुरा भइरहेको बताए।
‘पार्टी र राष्ट्रिय राजनीतिलाई अप्ठ्यारो तथा थप क्षति नहोस् भन्ने मेरो लाइन हो। सरसल्लाह गरेर छिट्टै हामी निर्णयमा पुग्छौं,’ उनले भने, ‘म पनि राप्रपा केन्द्रीय सदस्यको नाताले छलफल गरिरहेको छु।’
रामनारायणले शीर्ष नेताहरूबीच आफूहरूको सम्बन्ध पुरानै रहेको बताए।
‘अध्यक्षज्यू र पूर्वअध्यक्ष प्रकाशचन्द्र लोहनीसँग हाम्रो बुवाको सम्बन्ध राम्रो थियो, त्यसैले मैले पनि उहाँहरूलाई काका काका भनेर सम्बोधन गर्छु,’ उनले भने, ‘हामी यो वा त्यो गुटमा भन्दा पनि शीर्ष सबै नेताहरूसँग राम्रो सम्बन्ध छ।’
उनले अध्यक्ष लिङ्देनले आफूहरूलाई सहयोग गर्दै आएको पनि बताए। ‘त्यसैले म अध्यक्षज्यूलाई असजिलो नहुने गरी अघि बढ्न चाहन्छु,’ उनले भने।
राप्रपाले भने अनुशासन समितिको बैठक बोलाएको छ। उपाध्यक्ष रोशन कार्की नेतृत्वमा राप्रपामा अनुशासन समिति छ। अनुशासन समिति बैठक मंगलबार बस्ने र त्यस बेलासम्म सरकारबाट फिर्ता नआए मन्त्री विच्छामाथि स्पष्टीकरण सोध्न सकिने राप्रपाका एक नेताले बताए।
कात्तिक २२ गते तत्कालीन मुख्यमन्त्री जितेन्द्र सोनलले प्रदेश सभामा विश्वास मत प्रस्ताव राखेका थिए। त्यस दिन निवर्तमान मुख्यमन्त्री सतिशकुमार सिंह, त्रिभुवन साह, नेपाल संघीय समाजवादी पार्टीकी सांसद विमला अन्सारी र राप्रपाकी सांसद कञ्चन विच्छा प्रदेश सभा बैठकमा अनुपस्थित रहेका थिए।
विश्वासको मत पाउने स्थिति नरहेपछि सोनलले पदबाट राजीनामा घोषणा गरे। त्यस दिन प्रदेश सभामा अनुपस्थित रहेका दुई जना सांसद अन्सारी र विच्छालाई नवनियुक्त मुख्यमन्त्री सरोजकुमार यादवले आज मन्त्री बनाए। अन्सारी र विच्छाले आफूहरू तटस्थ बस्न प्रदेश सभामा अनुपस्थित रहेको बताएका थिए।
भदौ २३ र २४ गते जेनजी पुस्ताको आन्दोलनपछि राप्रपाका संघीय र प्रदेश सभा सदस्यहरूले सामूहिक राजीनामा दिएका थिए। पदबाट राजीनामा दिएका सांसदहरू प्रदेश सभा उपस्थित भएर मन्त्रीसमेत बनेपछि यसले राप्रपाभित्र तरंग ल्याएको छ।
-1762775255.jpg)
-1746009348.jpg)
