नेकपा (एमाले) काठमाडौं उपत्यकाका तीन जिल्ला अध्यक्ष महाधिवेशन प्रतिनिधि बनेनन्। शनिबार भएको प्रतिनिधि छनोटमा एमाले काठमाडौं जिल्ला अध्यक्ष दीपक निरौला, भक्तपुर अध्यक्ष बचन देउजा र ललितपुर अध्यक्ष पुरूषोत्तम आचार्य प्रतिनिधि नबनेका हुन्।
यसपटक नयाँलाई मौका दिन तीनै जिल्लाका अध्यक्ष सल्लाह गरेरै महाधिवेशन प्रतिनिधि नबनेको ललितपुर अध्यक्ष आचार्यले सेतोपाटीलाई जानकारी दिए।
‘यसपटक उपत्यकामै महाधिवेशन हुँदैछ। त्यसो हुँदा कामका हिसाबले महाधिवेशनमा हाम्रो सहभागिता भइहाल्छ। तर प्रतिनिधिका हिसाबले चाहिँ नबनौं भनेर हामीले तीनै जना अध्यक्षले सल्लाह गर्यौं। नयाँले मौका पनि पाउने भए,’ उनले भने।
ललितपुर अध्यक्ष आचार्यले पछिल्लो समय पार्टीमा जहाँ चुनाव हुन्छ त्यहाँ प्रतिस्पर्धा गरिहाल्ने प्रवृत्ति झाँगिएको भन्दै त्यसलाई निरूत्साहित गर्न पनि प्रतिनिधि नबनेको बताए।
‘हामीकहाँ के देखियो भने वडा अधिवेशन हुन्छ, त्यहाँ जाने बाकस थापिहाल्ने, त्यहाँ पराजित भएपछि पालिका तहको कमिटीमा उठ्ने, त्यहाँ पनि हारेपछि जिल्लामा जाने, जिल्लामा पनि जित्न नसकेपछि केन्द्रसम्मै ढ्वाङ बोकेर पुग्ने एउटा अवस्था पनि देखियो, त्यसलाई रोक्न पनि हामी यसपटक प्रतिनिधि नबन्ने सल्लाह गर्यौं,’ उनले भने।
उनले तीनै जना जिल्ला अध्यक्षको चाहना समान रहेको र केन्द्रीय सदस्य नबन्ने रहेकाले पनि अरूलाई मौका दिन सहज भएको बताए।
‘हामी तीनै जनाको माथि केन्द्रमा जाने चाहना छैन। हामी तीन वर्षका लागि जिल्ला अध्यक्ष निर्वाचित भएका हौं। डेढ वर्षमात्रै भएको छ, हामी जितेर आएको, एउटा भूमिकाका लागि निर्वाचित भएको मान्छे कार्यकाल पूरा नहुँदै अर्कोतिर जाने व्यवहारिक र सैद्धान्तिक हिसाबले पनि मिल्दो कुरा होइन,’ उनले भने। काठमाडौं उपत्यकाका तीनै जना जिल्ला अध्यक्ष दोहोरिएर निर्वाचित भएका हुन्। सबै महाधिवेशन प्रतिनिधि बनिसकेका छन्।
एमाले भक्तपुर अध्यक्ष बचन देउजाले पनि नयाँलाई अवसर दिन नै आफूहरूले प्रतिनिधि नजाने सल्लाह गरेको बताए। देउजा आठौं महाधिवेशनदेखिकै प्रतिनिधि हुन्।
‘सुरूमै मैले यसपटक प्रतिनिधि नजाने विचार गरेको बताएका थिए। त्यसमा ललितपुर र काठमाडौंका अध्यक्षज्यूहरू पनि सकारात्मक देखिनुभयो,’ उनले भने, ‘अहिले पार्टी बनाउनुपर्ने छ। यस्तो बेलामा नयाँनयाँलाई अवसर दिनुपर्छ। अवसर सधैं एउटैले लिने हो भने समस्या सिर्जना हुन्छ।’
भक्तपुरमा सबै प्रतिनिधि सर्वसम्मत छानिएको पनि उनले बताए।
‘मैले आफू जाने चाहना व्यक्त गरेको भए त्यसमा बाधा थिएन। तर नयाँलाई नै अवसर दिनुपर्छ ठानेँ। यसमा तीनै जना जिल्ला अध्यक्षको समान धारणा हो,’ उनले भने।
एमालेको ११ औं महाधिवेशन यही मंसिर २७, २८, २९ गते हुँदैछ। महाधिवेशन भक्तपुरको सल्लाघारीमा उद्घाटन हुनेछ। बन्दसत्र भने काठमाडौंको प्रदर्शनीमार्गस्थित भृकुटीमण्डपमा हुनेछ।
यो महाधिवेशनमा ललितपुरबाट १४ जना प्रतिनिधि छानिएका छन्। भक्तपुरमा समान १४ र काठमाडौंबाट ४८ जना प्रतिनिधि छानिएका छन्।
-1746009348.jpg)
