नेपाली कांग्रेसका नेता तथा सांसद अर्जुननरसिंह केसीले महँगी नियन्त्रण गर्न, सुशासन कायम गर्न नसकेको र जनताका समस्याप्रति उदासीन बनेको भन्दै सरकारको आलोचना गरेका छन्।
दसैँ, तिहार र छठ पर्वको अवसरमा शुभकामना व्यक्त गर्दै नेता केसीले सरकार गठन भएको सात महिना बित्न लाग्दा पनि जनताको दैनिक जीवनमा महसुस हुने गरी परिवर्तन आउन नसकेको बताएका हुन्।
उनले चाडपर्वका बेला बजारमा अत्यधिक मूल्यवृद्धि हुँदा सर्वसाधारणको जनजीवन प्रभावित भएको उल्लेख गरेका छन्। बजार अनुगमन प्रभावकारी हुन नसकेको र कालोबजारी नियन्त्रण गर्न सरकार असफल भएको उनको भनाइ छ।
केसीले वर्तमान सरकारप्रति जनतामा निराशा बढ्दै गएको भन्दै त्यसलाई समयमै सम्बोधन गर्नुपर्ने बताएका छन्। जनताको निराशा जुनसुकै बेला आक्रोशमा बदलिन सक्ने भएकाले सरकारले जनगुनासोलाई गम्भीरतापूर्वक लिनुपर्ने उनको सुझाव छ।
जेनजी आन्दोलनको भावना र निर्वाचनबाट प्राप्त जनमतअनुसार राज्य सञ्चालनको शैली परिवर्तन हुनुपर्नेमा पुरानै कार्यशैली र प्रवृत्ति दोहोरिएको उनले बताएका छन्। राजनीतिक नेतृत्व परिवर्तन भए पनि जनताले अपेक्षा गरेअनुसार काम हुन नसकेको उनको टिप्पणी छ।
उनले राजनीतिक नियुक्ति तथा प्रशासनिक सरुवा–बढुवामा देखिएको मनपरी अन्त्य गरी योग्यता, क्षमता र पारदर्शिताका आधारमा निर्णय गर्न सरकारलाई आग्रह गरेका छन्।
त्यस्तै, रोजगारीको अभावका कारण युवापुस्ता विदेश पलायन हुने क्रम रोक्न सरकारले ठोस योजना ल्याउनुपर्ने केसीको भनाइ छ। युवालाई स्वदेशमै बस्ने वातावरण बनाउन शिक्षा, रोजगारी, सुशासन र न्यायको सुनिश्चिततासहित आर्थिक तथा सामाजिक कार्यक्रम सञ्चालन गर्नुपर्ने उनले बताएका छन्।
बदलिँदो अन्तर्राष्ट्रिय परिस्थिति, नेपालको संवेदनशील भूराजनीतिक अवस्था र चुनौतीपूर्ण आर्थिक अवस्थालाई ध्यानमा राख्दै सरकारले स्पष्ट रणनीति बनाउनुपर्नेमा पनि उनले जोड दिएका छन्।
जनताका जायज प्रश्नको जबाफ दिनुको सट्टा विगतका सरकारको आलोचना गरेर मात्र नेतृत्वले जिम्मेवारी पूरा नहुने केसीले बताएका छन्। उनले सरकारलाई जनताका गुनासा सम्बोधन गर्न, असन्तुष्टिलाई सकारात्मक परिवर्तनमा रूपान्तरण गर्न र राष्ट्रिय सहमति कायम गर्न गम्भीर हुन आग्रह गरेका छन्।
