नेकपा (एमाले)को ११ औं महाधिवेशनका लागि संस्थापन इतर पक्षले पदाधिकारीमा ४ जनाको नाम अन्तिम टुंगो लगाएको छ।
थापा गाउँस्थित कार्यालयमा जारी छलफलबाट इतर पक्षले अध्यक्ष, उपाध्यक्ष, महासचिव र उपमहासचिवमा गरी चार जनाको नाम 'फाइनल' गरेको एक नेताले जानकारी दिए।
अध्यक्षमा ईश्वर पोखरेलले उम्मेदवारी दिनेछन्।
त्यस्तै एक उपाध्यक्षमा गोकर्ण विष्ट, महासचिवमा सुरेन्द्र पाण्डे र उपमहासचिवमा योगेश भट्टराईलाई उम्मेदवार बनाउने निर्णय भएको छ।
बाँकी उम्मेदवारबारे छलफल भइरहेको छ।
पदाधिकारीको संख्या बढाउने गरी आइतबार केन्द्रीय कमिटीको आकार बढाउने प्रस्ताव पारित गरेसँगै तुलनात्मक रूपमा ईश्वर पोखरेल समूहलाई आकांक्षीहरूको व्यवस्थापनका लागि सहज भएको ती नेताले बताए।
परशुमेघि गुरूङ, बिन्दा पाण्डे र अरूण नेपाललाई उपाध्यक्षको उम्मेदवार बनाउने तयारी छ।
उपमहासचिवमा थप दुई जनाको नाम टुंगिन बाँकी छ।
कृष्णगोपाल श्रेष्ठ, गोकुल बाँस्कोटा, कर्ण थापा, ठाकुर गैरे, रचना खड्का, विनोद ढकाल र इन्द्रलाल सापकोटालाई सचिवको उम्मेदवार बनाउने गरी छलफल चलिरहेको छ। थप २ जना कसलाई बनाउने भन्ने बारे पनि छलफल भइरहेको छ।
ओली समूहमा आकांक्षीहरूको संख्या बढी हुँदा सहमतिका लागि सकस परिरहँदा त्यहाँबाट असन्तुष्ट नेताहरूलाई पनि आफ्नो समूहको पदाधिकारीमा समेट्ने तयारी इतर पक्षको छ।
सोमबार बिहान १० बजेदेखि मध्याह्न १२ बजेसम्म उम्मेदवारको दरखास्त फाराम वितरण र बिहान १०:३० देखि दिउँसो साढे १ बजेसम्म फाराम दर्ता गर्ने कार्यक्रम छ।
-1763886130.jpeg)
-1746009348.jpg)
