नेकपा एमाले नेता रघुजी पन्त केपी शर्मा ओली निकट भनेर चिनिन्थे। तर जारी ११औं महाधिवेशनमा जब ओलीले आफ्नो प्यानलको नामसूची सार्वजनिक गरे, उनी त्यो सूचीमा परेनन्।
त्यसबीच ओली समूहमा नपरेका नेताहरूलाई आफूतिर तान्ने छलफल र संवादमा रहेको ईश्वर पोखरेल समूहले पन्तसँग कुराकानी अघि बढायो।
पन्तले पनि अन्तिम समयमा ईश्वर पोखरेल प्यानलबाट उपाध्यक्ष उम्मेदवार बन्न सहमति जनाए र त्यसै अनुसार मनोनयपत्र दर्ता गरे।
तर यहाँ खेलले नयाँ मोड लियो।
ओली प्यानलबाट उपाध्यक्ष प्रस्ताव गरिएका प्रदीप ज्ञवालीले आफू उक्त पदमा उम्मेदवार नबन्ने घोषणा गरे। पौडेलले महासचिव पदमा उम्मेदवारी दिन चाहेका थिए। तर उनी ओलीको रोजाइमा परेनन्। ओलीले यसपालि पनि महासचिव शंकर पोखरेललाई नै निरन्तरता दिन चाहे।
यसरी आफूले रोजेको महासचिव पदमा नपरेपछि ज्ञवालीले उपाध्यक्षमा उम्मेदवारी नै नदिने निर्णय लिए र केन्द्रीय कमिटी सदस्यमा मात्र उम्मेदवारी दिए।
ज्ञवालीको यो निर्णयले ओली प्यानलमा पाँच उपाध्यक्षमध्ये एउटा पद खाली भयो। त्यसपछि ओली समूहले आफूसँग बिच्किएर पोखरेल समूहतिर लागेका रघुजी पन्तलाई आफ्नै प्यानलमा राखे।
यसरी ओलीबाट पोखरेल र फेरि पोखरेलबाट ओली समूहतिरै परेका रघुजी पन्तले अन्तिम समयमा उम्मेदवारी दिए पनि उपाध्यक्ष पदको गन्तव्यमा पुग्न सफल भएका छन्।
पाँच उपाध्यक्ष चुनिनेमा उनले १२५८ मत ल्याएर पाँचौं स्थानमा परेका छन्।
उपाध्यक्षमा विजयी हुनेमा पन्तसहित पृथ्वीसुब्बा गुरूङ, रामबहादुर थापा 'बादल', विष्णु पौडेल र गोकर्ण विष्ट छन्। यी मध्ये गोकर्ण मात्र ईश्वर पोखरेल समूहका हुन्।
-1746009348.jpg)
