राष्ट्रिय स्वतन्त्र पार्टीसँग एकता गर्ने निर्णय गरेको कुलमान घिसिङ संरक्षक रहेको उज्यालो नेपाल पार्टीबाट तत्कालका लागि सानो संख्यामा केन्द्रीय सदस्य थपिने भएका छन्।
कुलमान घिसिङ निकट स्रोतका अनुसार दुई जना पदाधिकारी र ४ देखि ५ जना केन्द्रीय सदस्य राष्ट्रिय स्वतन्त्र पार्टीमा सम्मिलित गर्ने तयारी भएको हो।
राष्ट्रिय स्वतन्त्र पार्टीमा घिसिङ पहिलो नम्बरको उपसभापति बन्ने गरी एकताको सहमति भएको थियो।
उज्यालो पार्टीभित्र राष्ट्रिय स्वतन्त्र पार्टीको केन्द्रीय सदस्य बन्न हानाथाप छ।
‘७० प्रतिशत केन्द्रीय सदस्यले केही पनि भूमिका नपाउने भएपछि आफ्नो राजनीति जोगाउन उज्यालो नेपाल पार्टी नै कायम राख्छौँ भनिराख्नु भएको छ’, कुलमान निकट ती नेताले भने, ‘उहाँहरू सबैसँग कुरा गरेर सिंगो पार्टी नै एकतामा लैजाने चाहना कुलमानजीको छ।’
पार्टी एकता प्रक्रियामा बहुमत सदस्य बाहिर रहेको अवस्थामा उनीहरुले उज्यालो नेपाल पार्टी र चुनाव चिह्न ‘बल्ब’ प्रयोग गर्न सक्छन्। निर्वाचन आयोगमा मनोनयन दर्ता अघि एउटा निवेदन दिएर उनीहरूले दल कायम राख्न सक्छन्।
‘कुलमानजीलाई तत्काल केन्द्रीय समितिमा धेरै जना पठाउन अप्ठ्यारो छ’, ती नेताले भने, ‘पद थोरै छ। आकांक्षी धेरै छन्। त्यसैले एकताको पूर्ण घोषणा अलिक पछि हुनसक्छ।’
तर एकता गर्ने निर्णय गरिसकेका कारण कुलमान घिसिङलाई राजनीतिक भेला गर्न भने अप्ठ्यारो भएको छ।
‘पुरानो नाम र झण्डामा कार्यक्रम गर्न पनि मिलेन। नयाँमा गर्न एकता भइसकेको छैन,’ ती नेताले भने, ‘अर्कोतर्फ उम्मेदवार कहाँबाट कसलाई उठाउने लगायतका विषयमा छलफल गर्न मान्छे टुंगो लगाउनुपर्ने छ। त्यसैले एकतामा हतारो छ।’
वार्ता र विभिन्न कार्यसमितिमा बस्ने व्यक्ति टुङ्ग्याउने गरी कुलमान पक्षले केन्द्रीय सदस्य र पदाधिकारी पठाउन लागेको हो।
रास्वपामा कुलमान पक्षबाट जितराम लामा सहमहामन्त्री र राजु थापा सहप्रवक्ता बनाउने चर्चा चलिरहेको छ। तर टुंगो लाग्न बाँकी छ।
‘आजै टुंगो लाग्न पनि सक्छ,’ ती नेताले भने, ‘कुराकानी चलिरहेकै छ।’
-1746009348.jpg)
