राष्ट्रिय स्वतन्त्र पार्टी (रास्वपा) का सभापति रवि लामिछानेले राजनीतिमा कविदेखि मोडलसम्म आएकोबारे प्रस्टीकरण दिएका छन्।
सोमबार आयोजित बृहत् राजनीतिक समायोजन घोषणा सभामा उनले कवि, कलाकार, मोडलहरू राजनीतिमा हस्तक्षेप गर्न बाध्य भएर आएको बताएका छन्।
‘कविहरू आए, कलाकारहरू आए, मोडलहरू आए भनेर चिन्ता लिनुभएको छ। के कवि, कलाकार, मोडलहरूलाई कविलाई कविता लेख्न छाड्नुपर्यो, कलाकारलाई कलाकारिता गर्न खान बस्न दिनुभयो तपाईंहरूले? दिनुभएन। त्यसैले हस्तक्षेप गर्न बाध्य भएका हुन्,’ उनले भने, ‘मुलुक जब अप्ठ्यारो स्थितिमा आउँछ। राजनीति गर्नेहरूले सही राजनीति जब गर्दैनन्, त्यतिखेर देशका हर पेसाकर्मीले हस्तक्षेप गर्नुपर्छ। यो हस्तक्षेप गर्ने बेला हो।’
लामिछानेले पुराना दललाई असक्षमता स्वीकार्न अनुरोध गरेका हुन्।
‘पुराना राजनीतिक दलहरू जो यदाकदा आएको परिवर्तनलाई स्वीकार्न अप्ठ्यारो मानिरहेको देखिरहेको छु। उहाँहरूलाई म विनम्रतापूर्वक भन्न चाहन्छु, स्वीकार्नुस् आफ्नो असक्षमतालाई स्वीकार्नुस्। मुलुक जरजर अवस्थामा पुगिसकेको छ,’ उनले भने।
त्यस्तै, उनले थप गएगुज्रेको बहिर्गमनको सपना नदेख्न पनि अनुरोध गरे।
‘जति तपाईंहरूले पछिल्लो समय कुशासनको चपेटामा मुलुकलाई यो अवस्थामा पुर्याउनुभयो। अब थप गएगुज्रेको बहिर्गमनको सपना नदेख्नुस्। अपदस्थताको पराकाष्ठ यस भन्दा पर नसोचिदिनुस्। निर्वाचनमा मुलुकलाई सहज रूपमा लैजान दिनुस्,’ उनले भने।
-1746009348.jpg)
