कोशी प्रदेशका मुख्यमन्त्री हिक्मतकुमार कार्कीले प्रदेश मन्त्रिपरिषद् पुर्नगठन गरेका छन्।
पहिलेझैं एक जना महिलालाई राज्यमन्त्री मात्रै बनाएर मुख्यमन्त्री कार्कीले दलितविहीन मन्त्रीमण्डल बनाएका छन्।
२०८१ असार १७ मा कांग्रेस र एमालेबीच सात बुँदे सहमति भएपछि सुरू भएको विघटित संसद्का यी दुई ठूला दलबीचको सत्ता सहयात्रायता कोशीमा दोस्रोपटक मन्त्रीमण्डल हेरफेर भएको हो।
मंगलबार मुख्यमन्त्री कार्कीले कांग्रेसबाट चार जना मन्त्री र एक राज्यमन्त्री नियुक्त गरेका छन्। एमालेबाट पनि चार मन्त्री र एक राज्यमन्त्री बनेका छन्। कांग्रेसले मन्त्रिपरिषदमा एक जना महिलालाई राज्यमन्त्रीको भूमिकामा पठाउँदा एमालेले पुरूषहरू मात्रै नियुक्त गरेको छ।
कांग्रेस कोशी प्रदेश सभामा १० जना महिला सांसद छन् भने एमालेमा १४ जना छन्।
कोशीको मन्त्रीमण्डलमा एक जना पनि दलित छैनन्।
यसअघि कांग्रेस र एमालेले जुन–जुन मन्त्रालय सम्हालेका थिए तिनै मन्त्रालयमा दुवै दलले नयाँ मन्त्री पठाएका हुन्।
कांग्रेसको नेतृत्व गरेर गएका प्रदिप कुमार सुनुवारले भौतिक पूर्वाधार विकास मन्त्रालयको जिम्मा पाएका छन्। यसअघि उक्त मन्त्रालयमा कांग्रेसकै भूपेन्द्र राई मन्त्री थिए।
संस्थापन पक्षको देउवा टिमका केन्द्रीय सदस्य उनी यसअघि तीन पटक मन्त्री बनिसकेका नेता हुन्। यद्यपि केही दिन र महिनाका लागि मात्रै बनेको भन्दै उनलाई फेरि अवसर दिइएको कांग्रेस नेताहरूले बताएका छन्।
कांग्रेसकै भीम पराजुलीले पर्यटन, वन तथा वातावरण मन्त्रालयको जिम्मा पाएका छन्। विराटनगर महानगरका पूर्वमेयर पराजुली कृष्णप्रसाद सिटौला समूहका हुन्। यो मन्त्रालयमा यसअघि कांग्रेसकै सदानन्द मण्डल मन्त्री थिए।
झापाका एमाले सांसद तिलचन पाठकले खानेपानी, सिँचाइ तथा ऊर्जा मन्त्रालयको जिम्मा पाएका छन्। यो मन्त्रालयमा झापाकै एकराज कार्की मन्त्री थिए।
अध्यक्ष ओलीनिकट पाठकले केही दिनअघि झापा ५ मा काठमाडौंका मेयर बालेन शाहले उम्मेदवारी दिए जमानत जफत गराइदिने भाषण गरेको भिडिओ भाइरल भएको थियो।
धनुकटाका एमाले सांसद इन्द्रमणि पराजुली आन्तरिक मामिला तथा कानून मन्त्रालयको मन्त्री बनेका छन्। यसअघि रेवतीरमण भण्डारी यो मन्त्रालयमा थिए। प्रदेशमा दोस्रो कार्यकाल सांसद रहेका भण्डारीले पहिलो कार्यकालमा विधायन समिति सभापतिको जिम्मेवारी पाएका थिए।
एमालेकै विदुर कुमार लिंथेपले आर्थिक मामिला तथा योजना मन्त्रालयको जिम्मा पाएका छन्। संखुवासभाका उनी एमाले प्रमुख सचेतक थिए।
यसअघि सो मन्त्रालयमा इलामका रामबहादुर मगर मन्त्री थिए। एमालेको गोदावरीमा सम्पन्न विधान अधिवेशनताका एक जना बालिकालाई उनी चढेकै गाडीले ठक्कर दिएको थियो। त्यसबेला प्रधानमन्त्रीसमेत रहेका अध्यक्ष ओलीले ‘गाडीले बालिकालाई च्यास्स छोएको’ बताएका थिए।
एमालेकै रामप्रसाद महतो सामाजिक विकास मन्त्रालयको मन्त्री बनेका छन्। यसअघि एमालेकै पाँचकर्ण राई मन्त्री थिए।
यसअघि दुईटा मन्त्रालय नपाएर सरकारमा नगएको कांग्रेसको शेखर कोइराला पक्ष यसपटक सहभागी भएको छ। यद्यपि दुइटा मन्त्रालयलाई बटमलाइन बनाएर यसअघि सरकारमा नगएको कोइराला पक्ष यसपटक एउटै मन्त्रालय लिएर सरकारमा सहभागी भएको छ।
कोइराला पक्षका मान बहादुर लिम्बु स्वास्थ्य मन्त्रालयको मन्त्री बनेका छन्। यसअघि कोइराला समूह सहभागी नभएपछि सिटौला पक्षका भूपेन्द्र राईले नै यो मन्त्रालय सम्हालेका थिए।
अहिले कोइराला पक्षबाट मन्त्री बनेका मोरङका लिम्बू पछिल्लो समयमा भने महामन्त्रीहरू गगन थापा र विश्वप्रकाश शर्मा निकट मानिन्छन्।
कांग्रेसबाट मन्त्री बनेका सुनसरीका इस्राईल मन्सुरीले उद्योग, कृषि तथा सहकारी मन्त्रालयको जिम्मा पाएका छन्। देउवा पक्षका नेता ज्ञानेन्द्रबहादुर कार्कीका विश्वासपात्र मन्सुरीले यसअघि खगेनसिंह हाङ्गामले सम्हालेको मन्त्रालयको जिम्मा पाएका हुन्।
नयाँ मन्त्रिपरिषदमा दुई जना राज्यमन्त्री छन्। एमालेबाट उमाकान्त गौतमले आन्तरिक मामिला तथा कानून मन्त्रालयको राज्यमन्त्रीको जिम्मा पाएका छन्।
कांग्रेसकी शोभा चेम्जोङ यो मन्त्रिपरिषदकी एक मात्र महिला हुन्। उनी भौतिक पूर्वाधार विकास मन्त्रालयको राज्यमन्त्री बनेकी छन्।
कांग्रेस र एमालेमा एक/एक जना दलित सांसद छन्।
-1746009348.jpg)
