नेपाली कम्युनिष्ट पार्टीका संयोजक पुष्पकमल दाहालले प्रतिनिधि सभा सदस्य निर्वाचनमा कुनै पनि दलसँग गठबन्धन नहुने बताएका छन्।
मंगलबार पार्टी केन्द्रीय कार्यालय पेरिसडाँडामा सञ्चारकर्मीहरुसँग कुरा गर्दै उनले कुनै पनि दलसँग गठबन्धन गर्नेबारे कुरा नभएको र नहुने बताएका हुन्।
भारत जानुअघि संयोजक प्रचण्डले नेकपा (एमाले)का अध्यक्ष केपी शर्मा ओलीसँग छलफल गरेका थिए। यद्यपि त्यो छलफलमा गठबन्धन गर्नेबारे कुराकानी नभएको उनले बताएका छन्।
'गठबन्धनको केही पनि कुरा भएको छैन। घेटघाट त विभिन्न कामका लागि हुन्छ तर कुनै गठबन्धन भएको छैन, हुदैन पनि,' उनले भने।
उनले नेकपा एक्लै चुनावमा जाने बताए।
संयोजक प्रचण्डले रवि-बालेन लगायतको एकताले आफूहरू नडराएको पनि बताए।
'हामी रवि–बालेनको गठबन्धबाट बिल्कुल डराएका छैनौं। रविलाई मेरै क्याबिनेटमा दुई पटक गृहमन्त्री बनाएको हो। उहाँसँग कुरा गर्न मैले कुनै आइतबार पर्खनुपर्दैन। हामी डराएका पनि छैनौं,’ उनले भने।
संयोजक प्रचण्डले प्रवास कमिटीको एकता सभामा सहभागी हुन आफू भारत गएको स्पष्ट पारे। त्यही क्रममा भारतीय दलहरूका नेताहरूसँग पनि भेटवार्ता भएको बताए।
‘हाम्रो पार्टी एकता भइसकेपछि सबै प्रदेहरुमा एकता सभा राखेको तपाईहरुलाई थाहा नै छ। दिल्लीमा पनि एउटा एकता सभा राखिएको थियो। म मुख्यतः त्यही कामका लागि भारत भ्रमणमा गएको हो। अब त्यहाँ गइसकेपछि विभिन्न खालका भेटघाट त भइ नै हाल्छन्। हाम्रो राजदुत आउनुभयो, कयौं भारतीय जनता पार्टी (बिजेपी)का नेताहरु आउनुभयो। स्वागत गर्नुभयो, सम्मान गर्नुभयो। तर त्यस्तो औपचारिक कुराकानी केही पनि भएको छैन,' उनले भने।
-1756446574.jpg)
-1746009348.jpg)
