नेपाली कांग्रेस, नेकपा एमाले र जनता समाजवादी पार्टी नेपालको गठबन्धनले राष्ट्रिय सभा सदस्य निर्वाचनका लागि उम्मेदवारी दर्ता गरेका छन्।
गण्डकी प्रदेशमा खाली हुने दुइटा सिटका लागि कांग्रेस र एमालेले एक–एक सिट बाँडफाँड गरेर उम्मेदवारी दर्ता गरेको हो।
एमालेले महिला कोटामा गोरखाकी सम्झना देवकोटालाई उम्मेदवार बनाएको छ। नेपाली कांग्रेसले तनहुँबाट डा. जगत तिमिल्सिनालाई उम्मेदवार बनाएको छ। उनीहरू दुबैले बुधबार निर्वाचन कार्यालय पुगेर उम्मेदवारी दर्ता गरिसकेका छन्।
उम्मेदवारी दर्ता गर्न कांग्रेस नेता एवं गण्डकीका मुख्यमन्त्री सुरेन्द्रराज पाण्डे र एमाले सचिव खगराज अधिकारी लगायत नेता तथा कार्यकर्ता निर्वाचन कार्यालय पुगेका थिए।
कांग्रेसबाट राष्ट्रिय सभा सदस्य उम्मेदबार बनेका तिमिल्सिना पार्टी निकट प्राध्यापक संघका केन्द्रीय अध्यक्ष हुन्। कांग्रेस गण्डकीले राष्ट्रिय सभा उम्मेदवारका लागि ५० जनाको नाम सिफारिस गर्दा तिमिल्सिना परेका थिएनन्।
पार्टीको कार्यसम्पादन समितिले उनलाई गण्डकीबाट उम्मेदवार बनाउने निर्णय गरेको थियो।
यस्तै, एमालेकी सम्झना देवकोटा पटक-पटक निर्वाचनमा पराजित भएकी थिइन्। २०८० सालमा राष्ट्रिय सभा सदस्यमै निर्वाचन लडेकी देवकोटा त्यतिबेला पराजित भएकी थिइन्। त्यतिबेला कांग्रेस र माओवादी केन्द्रको गठबन्धन बनेको थियो।
२०७४ सालको स्थानीय निर्वाचनमा गोरखा नगरपालिकाको उपमेयरमा पराजित भएकी देवकोटा २०७९ को स्थानीय निर्वाचनमा मेयर लडेकी थिइन्। त्यतिबेला पनि उनी पराजित भएकी थिइन्।
यसपालि कांग्रेस र एमालेको गठबन्धन भएकाले उनीहरू दुबै जनाले राष्ट्रिय सभा सदस्य निर्वाचन जित्ने देखिन्छ।
यता, नेपाली कम्युनिष्ट पार्टी (नेकपा)ले भने मनाङका कपिल लामा र कास्कीकी गोमा घिमिरे ‘रूची’लाई उम्मेदवार बनाएको छ। उनीहरूले पनि उम्मेदवारी दर्ता गरिसकेको गण्डकी प्रदेश निर्वाचन कार्यालयले जनाएको छ।
-1756446574.jpg)
-1746009348.jpg)
