नेपाली कांग्रेसका केन्द्रीय सदस्य चन्द्र भण्डारी र निवर्तमान प्रतिनिधि सभा सांसद सुनिल शर्माले बुधबार महामन्त्री गगन थापासँग कुराकानी गरेका छन्।
उक्त कुराकानी क्रममा भण्डारीले महामन्त्री थापालाई कांग्रेसको नेतृत्व गर्ने गरी दृष्टिकोण दिन आग्रह गरेका छन्।
भण्डारी १४औं महाधिवेशनमा नेता शेखर कोइराला प्यानलबाट उपसभापति र थापा महामन्त्री पदमा उठेका थिए।
‘अहिले पनि कांग्रेसले नेतृत्वदायी भूमिका खेलोस् भन्ने मानिसहरूलाई छ। अहिले नेपाली जनतालाई सन्देश दिनु छ- यो देश, पार्टी र जनता हाम्रो हो। यो प्रजातन्त्र र यो संविधान हामीले बनाएको हो। यसको संरक्षण, विकास र सुरक्षाका निम्ति हामी एकजुट छौं। त्यसका लागि राम्रो र सक्षम पार्टी बनाउँछौं, कार्यकर्तालाई समान अवसर र न्याय दिन्छौं भन्ने प्रतिबद्धता व्यक्त गर्नुपर्छ,’ महामन्त्री थापासँगको कुराकानीमा भण्डारीले भने, ‘त्यसकारण तपाईंहरू दुई जना महामन्त्री हुनुहुन्छ। अरू साथीहरूलाई आश्वासन दिएर यो पार्टी अब हामी नेतृत्व गर्दैछौं भन्ने दृष्टिकोण दिनुस्, यो अहिलेको आवश्यकता हो।’
भण्डारीले थापासँगको आफ्नो कुराकानीको भिडिओ सामाजिक सञ्जालमा सेयर पनि गरेका छन्।
भण्डारी र शर्मा दुवै नेता कोइरालानिकट हुन्। तर पछिल्लो समय शर्माले आफूले १५औं महाधिवेशनमा सहमहामन्त्री उम्मेदवार माग्ने, त्यो दिन कोइराला तयार नभए चन्द्र भण्डारी नेतृत्वमा बेग्लै प्यानल बनाएर महामन्त्री पदमा उठ्ने अभिव्यक्ति दिएका थिए।
बुधबार महामन्त्री थापासँगको भेटमा नेता सुनिल शर्माले देशभरका कार्यकर्ताहरू अहिले आक्रोशित रहेको बताएका थिए।
‘देशभर कार्यकर्ता आक्रोशित छन्, अघि बढ्नुस्, हाम्रो साथ छ,’ शर्माले महामन्त्री थापासँग भनेका थिए।
महामन्त्री थापाले भण्डारी र शर्मालाई आफू र अर्का महामन्त्री विश्वप्रकाश शर्माले पार्टीलाई बलियो बनाउने अभियान सञ्चालन गरेको बताएका थिए।
थापाले आफूहरूले चलाइरहेको अभियानले पार्टीलाई बलियो र फुट्न नदिने पनि बताए।
केहीले पार्टी फुटको हल्ला चलाइरहेको उल्लेख गर्दै उनले ‘कसैले चाहेर पनि पार्टी नफुट्ने’ बताएका हुन्।
‘हाम्रो अभियानबाट पार्टी बलियो हुन्छ। कोही मानिसले पार्टी फुट्छ कि फुटाउँछन् कि भनेर भन्छन्। तपाईंहरूलाई साक्षी राखेर देशभरका कार्यकर्तालाई आश्वस्त बनाउँछु कि, पार्टी फुट्दैन। कसैले चाहेर पनि फुट्दैन। साँच्चै असजिलो अवस्था आयो भने त म आफू विष पिउँछु नि, एकतालाई जोगाउँछु,’ उनले भने।
उनले पार्टीलाई सान्दर्भिक बनाउन अभियान चलाइएको र त्यसैको प्रयास भइरहेको बताएका हुन्।
नेकपा एमालेतर्फ लक्ष्य गर्दै उनले जेनजी आन्दोलन केही होइन भन्ने ढंगले लिने गरेको पनि बताए। त्यसरी कांग्रेसले सोच्न नहुने उनको भनाइ थियो।
-1756446574.jpg)
-1746009348.jpg)
