काठमाडौंको १० निर्वाचन क्षेत्रमा एमालेबाट कोको भए उम्मेदवार सिफारिस?

क्षेत्र नम्बर २, ४, ५, ८ मा एकल सिफारिस

सेतोपाटी संवाददाता

काठमाडौं, पुस २४

फागुन २१ गते हुने प्रतिनिधि सभा निर्वाचनका लागि नेकपा एमाले काठमाडौंले १० वटा निर्वाचन क्षेत्रको उम्मेदवारको नाम माथिल्लो कमिटीमा पठाएको छ। जिल्ला अध्यक्ष दीपक निरौलाका अनुसार क्षेत्रको विस्तारित बैठक, निर्वाचन क्षेत्रको सिफारिसको आधारमा जिल्लाले सुझाव माथिल्लो कमिटीमा पठाएको हो।

अब यी नाम प्रदेश कमिटीले रूजु गरेर केन्द्रीय सचिवालयमा पठाउने छ।

जिल्ला अध्यक्ष निरौलाका अनुसार क्षेत्र नम्बर एकबाट मोहन रेग्मी, शर्मिला कार्की र सरोज ढकाल सिफारिस भएका छन्।

काठमाडौं–२ बाट मणिराम फुयाल तलबाटै एकल रूपमा सिफारिस भएका आएका थिए। जिल्लाले पनि नाम थप नगरी उनको नाम एकल पठाएको छ।

क्षेत्र नम्बर ३ मा रामेश्वर फुयाल, कृष्ण राई, शान्ति श्रेष्ठको नाम जिल्लाले पठाएको छ। क्षेत्रबाट रामेश्वर फुयाल, कृष्ण राई, शान्ति श्रेष्ठ, पेमाछिरी शेर्पा, विदुर चालिसे, विकास चालिसको नाम आएको थियो। क्षेत्र नम्बर ४ मा डा. राजन भट्टराईको नाम एकल पठाएको छ। त्यहाँ क्षेत्रको विस्तारित बैठकमा १३ जनाको नाम आएको भए पनि निर्वाचन क्षेत्र र जिल्लाले एकल नाम पठाएका हुन्। क्षेत्र नम्बर ५ बाट ईश्वर पोखरेलको नाम एकल रूपमा आएको छ।

उनले उठ्ने इच्छा नदेखाए किरण शाह ठकुरी, दीपक निरौला, दीपेन्द्र श्रेष्ठ, नारायण सिलवाल, बाबुलाल डंगोल, शान्ति बस्नेत, अधिकारीमध्येबाट उम्मेदवार बनाउन जिल्लाले सिफारिस गरेको छ।

निर्वाचन क्षेत्र नम्बर ६ मा अमनकुमार मास्के, रामेश्वर बोहरा, रुक्मणी भण्डारी सिफारि भएका छन्। उनीहरूको नाम निर्वाचन क्षेत्रबाट आएको थियो। जिल्लो त्यहीअनुसार सुझाव दिएको हो।

क्षेत्र नम्बर ७ मा सपना अर्याल बानिया, प्रेमलाल श्रेष्ठ, प्रकाश श्रेष्ठ सिफारिस भएका छन्। यहाँ पनि निर्वाचन क्षेत्रकै सिफारिसका आधारमा जिल्लाले माथिल्लो कमिटीमा सुझाव पठाएको हो।

क्षेत्र नम्बर ८ मा पनि एकल नाम आएको छ। त्यहाँ राजेश शाक्यको नाम सिफारिस भएर आएको निरौलाले बताए।
क्षेत्र नम्बर ९ मा कृष्णगोपाल श्रेष्ठ, अजयक्रान्ति शाक्य र मीना काफ्ले सिफारिस भएका छन्।